
Azərbaycan xalqının tarixində elə günlər var ki, onlar yalnız təqvimdə bir tarix deyil, həm də milli qürurun, qəhrəmanlığın, əzmin və tarixi ədalətin təntənəsidir. 20 Noyabr – Ağdam Şəhəri Günü də belə əlamətdar günlərdən biridir.
Ağdam Azərbaycanın qədim tarixə, zəngin mədəniyyətə və özünəməxsus mənəvi dəyərlərə malik şəhərlərindən biridir. Qarabağın dilbər guşəsində yerləşən bu şəhər uzun illər ərzində öz gözəlliyi, memarlıq abidələri, mədəniyyət ocaqları və qonaqpərvər insanları ilə tanınıb. Lakin Ermənistanın Azərbaycana qarşı həyata keçirdiyi işğalçılıq siyasəti nəticəsində Ağdam şəhəri uzun illər düşmən tapdağı altında qalıb, dağıntılara və vandalizmə məruz qalıb.
2020-ci il sentyabrın 27-də başlayan Vətən müharibəsi Azərbaycan tarixində yeni bir səhifə açdı. Müzəffər Ali Baş Komandan İlham Əliyevin rəhbərliyi, rəşadətli Azərbaycan Ordusunun qəhrəmanlığı və xalqımızın birliyi sayəsində torpaqlarımız işğaldan azad edildi. 2020-ci il noyabrın 10-da imzalanmış üçtərəfli Bəyanata əsasən, noyabrın 20-də Ağdam rayonu Azərbaycana qaytarıldı. Bu hadisə xalqımızın çoxəsrlik tarixində mühüm qələbələrdən biri kimi yaddaşlara həkk olundu.
Ağdamın azad olunması təkcə bir rayonun geri qaytarılması deyildi. Bu, illərlə doğma yurd həsrəti ilə yaşayan minlərlə insanın qəlbində ümid çırağının yenidən yanması, tarixi ədalətin bərpası və milli iradənin təntənəsi idi.
İşğal dövründə Ağdamın şəhər mərkəzi, tarixi-mədəni abidələri, yaşayış evləri, məktəbləri və digər sosial obyektləri dağıdılmışdı. Bir zamanlar həyatın qaynayıb-qarışdığı şəhər xarabalığa çevrilmişdi. Ağdamın məşhur Cümə məscidi, İmarət kompleksi və digər tarixi məkanları xalqımızın keçmişini, milli-mənəvi irsini özündə yaşadan qiymətli abidələrdir.
Bu gün Ağdamda genişmiqyaslı bərpa və quruculuq işləri həyata keçirilir. Şəhərin müasir şəhərsalma prinsipləri əsasında yenidən qurulması, yolların, yaşayış komplekslərinin, təhsil və səhiyyə müəssisələrinin, sosial infrastrukturun yaradılması Böyük Qayıdış proqramının mühüm istiqamətlərindəndir. Ağdamın sənaye potensialının inkişaf etdirilməsi məqsədilə Ağdam Sənaye Parkının yaradılması da regionun iqtisadi dirçəlişinə böyük töhfə verir.
Ağdamın yenidən qurulması yalnız dağıdılmış binaların bərpası deyil, həm də burada həyatın, sevincin, uşaqların gülüşünün, milli adət-ənənələrin və mədəniyyətin yenidən canlandırılması deməkdir. Doğma torpaqlarına qayıdan sakinlər üçün Ağdam artıq təkcə xatirələrdə yaşayan şəhər deyil, gələcəyə inamla addımlayan yeni bir həyat məkanıdır.
20 Noyabr – Ağdam Şəhəri Günü bizə Vətən sevgisinin, milli birliyin, dövlət-xalq-ordu həmrəyliyinin nə qədər böyük gücə malik olduğunu bir daha xatırladır. Bu tarix həm də torpaqlarımızın azadlığı uğrunda canından keçən şəhidlərimizin əziz xatirəsinə ehtiram, qazilərimizə minnətdarlıq günüdür.
Bu gün Ağdam yenidən qurulur, dirçəlir və öz tarixi şöhrətinə qovuşur. Əminik ki, yaxın gələcəkdə Ağdam Azərbaycanın ən gözəl, müasir və inkişaf etmiş şəhərlərindən birinə çevriləcək, Qarabağın iqtisadi, mədəni və sosial həyatında mühüm rol oynayacaqdır.
Yunis Eyyubov,
YAP Ağstafa rayon təşkilatının əməkdaşı



