Zəngilan Şəhəri Günü xalqımızın qürurla qeyd etdiyi tarixi bayram olmaqla yanaşı, Vətən uğrunda canından keçmiş şəhidlərimizin xatirəsini yad etmək üçün də mühüm fürsətdir. Şəhərin azad olunması Azərbaycan Ordusunun qəhrəmanlığı və hərbçilərimizin fədakarlığı ilə mümkün oldu. Bu qələbənin mənəvi dəyəri şəhidlərimizin xatirəsinə göstərilən ehtiramla daha da dərinləşir.
Müzəffər Ali Baş Komandan Prezident İlham Əliyevin rəhbərliyi ilə Azərbaycan Ordusu Vətən müharibəsində böyük iradə və peşəkarlıq nümayiş etdirdi. Döyüşlərdə iştirak edən hərbçilərimizin göstərdiyi qəhrəmanlıq ölkəmizin tarixində silinməz iz buraxdı. Şəhidlərin fədakarlığı xalqımızın azadlıq və ərazi bütövlüyü uğrunda mübarizəsinin ən müqəddəs səhifələrindəndir.
Zəngilanın azad edilməsi xəbəri doğma yurdlarına qayıtmaq arzusu ilə yaşayan insanlar üçün böyük sevinc yaratdı. Lakin bu sevincin arxasında ağır itkilər, ailələrin yaşadığı ağrı və qəhrəmanların fədakarlığı dayanır. Buna görə də tarixi qələbəni qeyd edərkən şəhid ailələrinə və qazilərə ehtiram göstərmək hər birimizin mənəvi borcudur.
Şəhidlərin xatirəsinin yaşadılması yalnız anım tədbirləri ilə məhdudlaşmamalıdır. Onların həyat yolu, vətənpərvərliyi və fədakarlığı gənc nəslə çatdırılmalı, milli-mənəvi dəyərlərin qorunmasına xidmət etməlidir. Təhsil müəssisələrində və ictimai tədbirlərdə bu mövzunun işıqlandırılması gənclərin məsuliyyət hissini gücləndirir.
Zəngilan Şəhəri Günü azadlığın qiymətini və Vətən qarşısında məsuliyyətimizi xatırladır. Prezident İlham Əliyevin rəhbərliyi ilə əldə edilmiş qələbənin nəticələrini qorumaq və azad edilmiş əraziləri inkişaf etdirmək şəhidlərimizin xatirəsinə ehtiramın mühüm ifadəsidir. Onların fədakarlığı xalqımızın yaddaşında daim yaşayacaq.
Lətifə Əlizadə,
YAP Nizami rayon təşkilatının fəalı
