Azərbaycanın qazandığı şanlı qələbə yalnız hərbi uğur deyil, həm də milli yaddaşa həkk olunan böyük bir dönüş nöqtəsidir. Bu zəfərin əbədiləşdirilməsi xalqımızın azadlıq uğrunda göstərdiyi birlik və iradənin gələcək nəsillərə ötürülməsi deməkdir. Qələbə həm tariximizin təkrarsız səhifəsi, həm də milli özünüdərkimizin möhkəmlənməsinin rəmzidir.
Ölkənin müxtəlif bölgələrində salınan memorial komplekslər, xatirə abidələri və zəfər parkları bu tarixi anın canlı şahidi kimi formalaşır. Hər bir abidə, hər bir memorial yalnız keçmişi xatırlatmır, həm də döyüşçülərin şərəfini ucaldır. Bu məkanlar yüz illər boyu Azərbaycanın haqq-ədalət uğrunda apardığı mübarizəni simvolizə edəcək.
Zəfərin əbədiləşdirilməsi təkcə fiziki layihələrlə məhdudlaşmır; elm, ədəbiyyat, kino və incəsənət də bu qələbənin ideya yükünü daşıyan əsas sahələrdir. Qalibiyyətin ruhu yeni nəslin mənəvi inkişafına təsir edir, gənclərdə vətənpərvərlik və milli qürur hissini daha da gücləndirir. Bu dəyərlərin qorunması qələbənin ideoloji davamlılığını təmin edir.
Bu prosesin mühüm tərəfi ondan ibarətdir ki, zəfər yalnız keçmişin xatırladılması deyil, həm də gələcəyin qurulması üçün möhkəm bünövrədir. Əbədiləşdirilən zəfər Azərbaycanı daha güclü, daha özünəinamlı və daha birləşmiş bir dövlət kimi təqdim edir. O, xalqın iradəsini, qətiyyətini və sarsılmaz birliyini simvolizə edərək hər zaman yaşamaqda davam edəcək.
Turan Zeynalzadə,
YAP Xəzər rayon təşkilatının fəalı
