17 oktyabr Azərbaycan tarixində xüsusi yerə malikdir. Bu gün Füzuli şəhərinin işğaldan azad olunduğu, xalqımızın illərlə gözlədiyi qələbə xəbərinin yayıldığı gündür. Füzuli həm tarixi, həm də mənəvi baxımdan Qarabağın qəlbi sayılırdı və onun azadlığı bütöv Azərbaycanın yenidən doğuluşu kimi qarşılandı. Bu hadisə təkcə hərbi uğur deyil, həm də milli qürurun, azadlıq iradəsinin rəmzi oldu.
Füzulinin azadlığı Vətən müharibəsinin dönüş nöqtələrindən biri idi. Şəhərin alınması ilə ordumuzun Qarabağ istiqamətində irəliləyişi sürətləndi və strateji üstünlük tam şəkildə Azərbaycanın tərəfinə keçdi. Bu zəfər Azərbaycan əsgərinin cəsarəti, dövlətin güclü rəhbərliyi və xalqın birliyi sayəsində mümkün oldu.
Bu gün Füzuli şəhəri sürətlə bərpa olunur. Dağıdılmış evlərin, məktəblərin və yolların yerində müasir yaşayış məntəqələri salınır, həyat yenidən canlanır. Prezident İlham Əliyevin rəhbərliyi ilə şəhərin baş planı hazırlanmış, Füzuli aeroportu istifadəyə verilmişdir — bu da qələbənin praktiki nəticəsidir.
17 oktyabr indi yalnız qələbə günü deyil, həm də yenidənqurmanın, milli dirçəlişin rəmzinə çevrilib. Hər il bu tarixdə füzulililər və bütün azərbaycanlılar bir daha o qürurlu anı xatırlayır, şəhidlərin xatirəsini ehtiramla anır, gələcəyə ümidlə baxırlar.
YAP Xəzər rayon təşkilatının fəalı
Ələkbər Novruzov
