Qubadlı rayonu 1993-cü il avqustun 31-də Ermənistan silahlı qüvvələri tərəfindən işğal edilmişdi. Bu işğal nəticəsində rayonun minlərlə sakini doğma torpaqlarından didərgin düşmüş, Qubadlının sosial-iqtisadi, tarixi və mədəni irsi dağıdılmış, təbii sərvətləri talan edilmişdi.
Otuz ilə yaxın müddət ərzində düşmən işğalı altında qalan Qubadlı, Azərbaycan xalqının yaddaşında daim işğal olunmuş, lakin qəlbdə azad olunması arzu edilən torpaqlardan biri kimi yaşamışdır.
2020-ci ilin payızında baş verən və 44 gün davam edən Vətən müharibəsi zamanı Azərbaycan Ordusu öz qəhrəmanlıq salnaməsini yazaraq torpaqlarımızın işğaldan azad edilməsinə nail oldu. Bu müharibə yalnız hərbi qələbə deyil, həm də milli qürurun, birliyin və əzmin təntənəsi idi.
Məhz həmin müharibə çərçivəsində – 2020-ci il oktyabrın 25-də Qubadlı şəhəri və rayonun böyük hissəsi qəhrəman Azərbaycan əsgərləri tərəfindən işğaldan azad olundu.
Qubadlının azad olunması yalnız bir rayonun qaytarılması ilə məhdudlaşmırdı – bu, həm də Laçın dəhlizinə gedən strateji yolun açılması, Ermənistanın hərbi-logistika imkanlarının ciddi şəkildə məhdudlaşdırılması demək idi. Qubadlının azad edilməsi ümumi qələbənin mühüm mərhələlərindən biri oldu.
Bu zəfər Azərbaycan Ordusunun gücünü, xalqla ordu və rəhbərlik arasındakı sarsılmaz birliyi bütün dünyaya göstərdi. Elə bu uğurlu hərbi əməliyyatların nəticəsində Ermənistan rəhbərliyi 2020-ci il noyabrın 10-da kapitulyasiya aktını imzalamağa məcbur oldu. Bu sənəd Azərbaycanın ərazi bütövlüyünün bərpasını rəsmiləşdirən, tarixi ədalətin bərqərar olunmasına mühüm töhfə verən sənəd kimi tarixə düşdü.
Qubadlı rayonunun işğaldan azad edilməsindən dərhal sonra Prezident İlham Əliyevin rəhbərliyi ilə burada genişmiqyaslı bərpa, yenidənqurma və infrastruktur layihələrinin icrasına başlanıldı. İşğal zamanı dağıdılmış yaşayış məntəqələrinin bərpası, yeni yolların çəkilməsi, sosial obyektlərin inşası, kənd təsərrüfatı və iqtisadi potensialın yenidən qurulması məqsədilə kompleks tədbirlər həyata keçirilir.
Qubadlıda “ağıllı kənd” konsepsiyasına uyğun infrastruktur layihələri reallaşdırılır, müasir məktəblər, xəstəxanalar, mədəniyyət evləri və sənaye parkları inşa olunur. Bütün bu işlərin əsas məqsədi – keçmiş məcburi köçkünlərin öz doğma yurdlarına tezliklə və ləyaqətlə qayıtmalarını təmin etməkdir.
Prezident İlham Əliyevin Qubadlıya etdiyi səfərlər xüsusi əhəmiyyət daşıyır. Bu səfərlər zamanı bölgənin bərpası və inkişafı üçün vacib təməlqoyma mərasimləri keçirilir, yeni layihələrə start verilir. Dövlət başçısının şəxsi nəzarəti ilə görülən işlər təkcə infrastrukturun deyil, eyni zamanda bölgənin iqtisadi və sosial həyatının yenidən qurulmasına yönəlmişdir.
Bununla yanaşı, Azərbaycan Respublikası Prezidentinin 31 iyul 2023-cü il tarixli Sərəncamı ilə işğaldan azad edilmiş ərazilər üzrə “şəhər günləri” təsis olunmuşdur. Bu qərar həm tarixi hadisələrin xatırlanması, həm də həmin günlərin milli yaddaşda əbədiləşdirilməsi baxımından mühüm əhəmiyyət daşıyır.
Qubadlı şəhərinin işğaldan azad edildiyi gün – 25 oktyabr tarixi Qubadlı şəhəri günü kimi qeyd olunur. Bu gün xalqımız tərəfindən böyük qürur, minnətdarlıq və Vətən sevgisi ilə yad edilir. Hər il bu gün münasibətilə müxtəlif tədbirlər keçirilir, şəhidlərin xatirəsi anılır, ordumuzun qəhrəmanlığı bir daha vurğulanır.
Gələcəyə baxdıqda, Qubadlının sosial-iqtisadi inkişaf perspektivləri çox genişdir. Regionun strateji mövqeyi, zəngin təbii sərvətləri, münbit torpaqları və turizm potensialı bu rayonun Azərbaycan iqtisadiyyatına böyük töhfələr verməsinə imkan yaradır.
İşğaldan əvvəl kənd təsərrüfatı ilə məşğul olan Qubadlı sakinləri üçün yeni imkanlar yaradılır, suvarma sistemləri və fermer təsərrüfatları bərpa olunur. Gələcəkdə Qubadlının sənaye və aqrar sahələrdə ölkənin aparıcı bölgələrindən birinə çevriləcəyi gözlənilir.
Qubadlı artıq yalnız işğaldan azad edilmiş bir torpaq deyil – o, həm də dirçəlişin, inkişafın və qayıdışın rəmzidir. Bu gün burada atılan hər bir addım gələcək nəslin rifahı üçün möhkəm təməl yaradır.
Bu torpaq, 30 illik nisgildən sonra öz sahiblərinə qovuşmağa, yenidən canlanmağa və inkişaf etməyə doğru irəliləyir.
Məmmədova Nərmin,
Yeni Azərbaycan Partiyası, məsləhətçi
