Azərbaycan bu gün dünyada sabitliyin, tolerantlığın və multikultural dəyərlərin qorunduğu ölkələrdən biri kimi tanınır. Ölkəmizdə müxtəlif dinlərin və xalqların nümayəndələrinin qarşılıqlı hörmət və anlaşma şəraitində yaşaması dövlət siyasətinin mühüm nailiyyətlərindən hesab olunur. Bu siyasətin əsas istiqamətlərindən biri də dinlərarası dialoqun təşviqi, xalqlar arasında həmrəyliyin möhkəmləndirilməsi və mənəvi dəyərlərin qorunmasıdır.
Prezident İlham Əliyevin Türk Dövlətləri Təşkilatının müsəlman dini idarə rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul etməsi bu istiqamətdə həyata keçirilən siyasətin növbəti təzahürü oldu. Görüş zamanı birliyin, həmrəyliyin və qarşılıqlı hörmətin müasir dünyada sülh və təhlükəsizliyin təmin olunmasında mühüm rol oynadığı vurğulandı.
Qəbul zamanı Azərbaycanın əsrlər boyu müxtəlif dinlərin və mədəniyyətlərin nümayəndələrinin dinc yanaşı yaşadığı məkan olduğu diqqətə çatdırıldı. Qeyd edildi ki, ölkəmizdə mövcud olan tolerantlıq mühiti yalnız tarixi ənənələrə deyil, eyni zamanda dövlət tərəfindən həyata keçirilən ardıcıl siyasətə əsaslanır. Bu siyasət cəmiyyətdə qarşılıqlı etimadın güclənməsinə, milli və dini müxtəlifliyin qorunmasına xidmət edir.
Görüşdə Türk dünyasında mənəvi bağların daha da möhkəmləndirilməsinin əhəmiyyəti də vurğulandı. Ortaq tarixə, mədəniyyətə və mənəvi dəyərlərə malik olan türk xalqları arasında əməkdaşlığın genişləndirilməsi regionda sabitliyin və inkişafın vacib amillərindən biri kimi qiymətləndirildi. Dini liderlərin bu prosesdə oynadığı rolun əhəmiyyətinə diqqət çəkilərək, onların sülh, birlik və qarşılıqlı anlaşma ideyalarının təşviqinə töhfə verdiyi qeyd olundu.
Yəhya Bakuvi Beynəlxalq Konfransının keçirilməsi də Azərbaycanın mənəvi dəyərlərə və dinlərarası dialoqa verdiyi önəmin göstəricisidir. Belə təşəbbüslər müxtəlif ölkələrdən olan dini və ictimai xadimləri bir araya gətirərək fikir mübadiləsi üçün əlverişli platforma yaradır, qlobal çağırışlar fonunda əməkdaşlığın genişlənməsinə şərait formalaşdırır.
Bu gün dünyada dini və etnik zəmində qarşıdurmaların baş verdiyi bir zamanda Azərbaycan fərqli yanaşma ortaya qoyur. Ölkəmiz qarşılıqlı hörmət, tolerantlıq və multikulturalizm prinsiplərinə əsaslanan modeli ilə beynəlxalq aləmdə nüfuz qazanmışdır. Prezident İlham Əliyevin qəbulunda səsləndirilən fikirlər də bir daha göstərdi ki, sülhə, dialoqa və həmrəyliyə əsaslanan münasibətlər müasir dünyanın ən vacib ehtiyaclarından biridir.
Prezident İlham Əliyevin dini liderlərlə görüşü Azərbaycanın humanitar dəyərlərə sadiqliyini, dinlərarası dialoqun inkişafına verdiyi töhfəni və Türk dünyasında mənəvi birliyin gücləndirilməsinə yönəlmiş səylərini bir daha nümayiş etdirdi. Bu qəbuldan verilən birlik, həmrəylik və qarşılıqlı hörmət mesajları həm regionda, həm də beynəlxalq miqyasda sülh və əməkdaşlığın təşviqi baxımından mühüm əhəmiyyət daşıyır.
Ləman Cəlilova,
Ağstafa rayon Heydər Əliyev Mərkəzinin direktoru
