2026-cı ilin 20 yanvar tarixində Davosda keçirilən Dünya İqtisadi Forumu çərçivəsində Prezident İlham Əliyevin “Euronews” televiziyasına verdiyi müsahibə təkcə cari hadisələrin şərhi deyil, həm də Azərbaycanın müasir dünyada öz yerini necə gördüyünü əks etdirən siyasi baxışların ifadəsi kimi diqqət çəkdi. Bu müsahibə qlobal proseslərin sürətlə dəyişdiyi bir dövrdə ölkənin mövqeyini daha geniş kontekstdə təqdim etdi.
Prezident İlham Əliyev müsahibə zamanı beynəlxalq münasibətlər sistemində formalaşan yeni reallıqlara toxunaraq qeyd etdi ki, dünya artıq əvvəlki qaydalarla idarə olunmur. Qlobal səviyyədə güc balansları dəyişir, beynəlxalq hüququn tətbiqində ikili standartlar müşahidə olunur. Bu şəraitdə dövlətlərin öz milli maraqlarına söykənən siyasət yürütməsi zərurətə çevrilib. Azərbaycan da məhz bu reallıqları nəzərə alaraq müstəqil, balanslı və praqmatik xarici siyasət kursunu davam etdirir.
Müsahibədə Cənubi Qafqaz regionu xüsusi yer tutdu. Prezident İlham Əliyev vurğuladı ki, uzun illər qarşıdurma və qeyri-sabitliklə yadda qalan region indi yeni mərhələyə qədəm qoyur. Sülh və əməkdaşlıq imkanlarının yaranması yalnız regional ölkələr üçün deyil, daha geniş coğrafiya üçün də əhəmiyyətlidir. Azərbaycan bu prosesdə təşəbbüskar mövqe tutaraq nəqliyyat və kommunikasiya xətlərinin açılmasını, iqtisadi əlaqələrin genişlənməsini regionun gələcəyi üçün əsas şərt hesab edir.
Enerji məsələləri Prezidentin müsahibəsində mühüm mövzulardan biri oldu. Dövlət başçısı Azərbaycanın Avropa üçün etibarlı enerji tərəfdaşı olduğunu qeyd edərək, ölkənin uzun illərdir öz öhdəliklərini ardıcıl şəkildə yerinə yetirdiyini xatırlatdı. Enerji təhlükəsizliyi mövzusunun qlobal gündəmdə xüsusi yer tutduğu bir vaxtda Azərbaycanın rolu təkcə iqtisadi deyil, eyni zamanda siyasi sabitlik baxımından da əhəmiyyət kəsb edir.
Prezident İlham Əliyev Avropa institutları ilə münasibətlərə də toxunaraq, bəzi dairələr tərəfindən Azərbaycana qarşı səsləndirilən tənqidlərin obyektivlikdən uzaq olduğunu bildirdi. Onun fikrincə, bu yanaşmalar real vəziyyəti əks etdirmir və çox vaxt siyasi motivlərə əsaslanır. Buna baxmayaraq, Azərbaycan öz müstəqil yolunu davam etdirir və xarici təzyiqlərdən asılı olmayan qərarlar qəbul etməyi prioritet hesab edir.
Davosda “Euronews”ə verilən bu müsahibə bir daha göstərdi ki, Azərbaycan regional çərçivə ilə kifayətlənməyən, qlobal prosesləri diqqətlə izləyən və öz mövqeyini açıq şəkildə ifadə edən dövlətdir. Prezident İlham Əliyevin səsləndirdiyi fikirlər ölkənin gələcək strategiyasının əsas xəttini – milli maraqlara söykənən, real vəziyyəti nəzərə alan və uzunmüddətli sabitliyə yönəlmiş siyasəti aydın şəkildə ortaya qoydu.
Günel Əbdurəhmanova,
Yeni Azərbaycan Partiyası,məsləhətçi
