Ulu Öndər Heydər Əliyevin 1996-cı ildə səsləndirdiyi fikirlər bu gün də aktuallığını qorumaqdadır. Ordunun yaranması və onun cəmiyyət həyatında daşıdığı rol, ölkənin müstəqilliyi və təhlükəsizliyi ilə birbaşa bağlıdır. Güclü ordu yalnız texniki vasitələrlə deyil, onu formalaşdıran əxlaqi və mənəvi dəyərlərlə də qurulur. Ordunun cəmiyyətin təməl dayaqlarından biri olduğunu dərk etmək vacibdir.
Gənclərin vətənpərvərlik ruhunda tərbiyə edilməsi və onların ordu xidmətinə hazırlığı, dövlətin gələcək inkişafında əhəmiyyətli rol oynayır. Bu istiqamətdə məktəblərdə, ailələrdə və ictimai təşkilatlarda görüləcək maarifləndirmə işləri cəmiyyətin bütövlüyünü möhkəmləndirir. Gənclərin hərbi xidmətə sadəcə məcburi bir öhdəlik kimi deyil, şərəfli vəzifə kimi yanaşmaları üçün düzgün ideoloji zəmin formalaşdırılmalıdır.
Xalq və ordu arasındakı əlaqə bir tək fiziki dəstəkdən ibarət deyil. Bu münasibət qarşılıqlı hörmət, mənəvi bağlılıq və ümumi məqsədlərə xidmət üzərində qurulmalıdır. Ordu xalqın içindən çıxır, xalq da ordunu özünün qoruyucusu kimi görməlidir. Bu qarşılıqlı etimad həm vətənin müdafiəsini gücləndirir, həm də cəmiyyətin bütövlüyünü təmin edir.
Heydər Əliyevin qeyd etdiyi kimi, bu vəzifələri ardıcıl və sistemli şəkildə həyata keçirmək hər birimizin üzərinə düşən tarixi məsuliyyətdir. Orduya verilən dəstək təkcə dövlətin deyil, bütün xalqın rifahına və təhlükəsizliyinə verilmiş dəstəkdir. Ordunun möhkəmliyi xalqın gücündən, xalqın gücü isə ordunun varlığından doğur.
Ələkbər Novruzov
YAP Xəzər rayon təşkilatının fəalı
