“Müasir Azərbaycan dövlətçiliyinin tarixində elə hadisələr var ki, onların əhəmiyyəti yalnız müəyyən bir dövrün siyasi prosesləri ilə məhdudlaşmır, bütöv bir xalqın gələcək taleyini müəyyən edən strateji dönüş nöqtəsinə çevrilir. 1993-cü il 15 iyun tarixi – Milli Qurtuluş Günü məhz belə hadisələrdəndir. Bu gün Azərbaycan Respublikasının dövlət müstəqilliyinin qorunması, siyasi sabitliyin bərpası, milli dövlətçilik ənənələrinin möhkəmləndirilməsi və sonrakı inkişaf modelinin formalaşdırılması baxımından müstəsna əhəmiyyət daşıyır”.
Bunu Yeni Azərbaycan Partiyası Nizami rayon təşkilatının sədri Ramil Vəlibəyov deyib.
Ramil Vəlibəyov bildirib ki, Milli Qurtuluş Günü yalnız hakimiyyət dəyişikliyini ifadə edən siyasi hadisə deyil: “Bu tarix Azərbaycan dövlətinin dağılmaq təhlükəsindən xilas olması, vətəndaş qarşıdurmasının qarşısının alınması, milli həmrəyliyin təmin edilməsi və gələcək inkişaf strategiyasının müəyyənləşdirilməsi baxımından müasir dövlətçilik tariximizin əsas mərhələlərindən biri hesab olunur. Bu mənada 15 iyun Azərbaycanın müstəqilliyinin faktiki olaraq qorunub saxlanıldığı və dövlətçilik institutlarının yenidən qurulduğu bir dönüş nöqtəsi kimi qiymətləndirilə bilər”.
Ramil Vəlibəyov qeyd edib ki, 1992-1993-cü illərdə Azərbaycan dövlət institutlarının iflası və suverenliyin itirilməsi riski ilə üzləşmişdi: “Beynəlxalq münasibətlər nəzəriyyəsində bu cür vəziyyətlər “uğursuz dövlət sindromu”nun ilkin mərhələsi kimi xarakterizə edilir. Məhz 1993-cü ilin iyun hadisələri Azərbaycan tarixində dönüş nöqtəsinə çevrildi. Ölkədə yaranmış dərin siyasi böhran fonunda xalqın təkidli tələbi ilə Heydər Əliyevin Bakıya dəvət olunması dövlətçilik tarixində mühüm mərhələ oldu. 9 iyun 1993-cü ildə Bakıya qayıdan Heydər Əliyev faktiki olaraq ölkənin xilası missiyasını öz üzərinə götürdü. 1993-cü il iyunun 15-də isə Heydər Əliyevin Ali Sovetin sədri seçilməsi Azərbaycan tarixində yeni mərhələnin başlanğıcı hesab olunur”.
“Milli Qurtuluş Gününün əhəmiyyəti yalnız siyasi hakimiyyət dəyişikliyi ilə izah oluna bilməz” – deyən Ramil Vəlibəyov əlavə edib ki, bu hadisə dövlətçiliyin xilas edilməsinin institusional əsaslarını formalaşdırdı: “1993-cü ildən sonra dövlət idarəetməsinin yenidən qurulması prosesi başlandı. Hüquq-mühafizə orqanlarının fəaliyyəti gücləndirildi, dövlət nəzarəti bərpa olundu və ölkədə sabitlik təmin edildi. 1995-ci ildə qəbul edilən Konstitusiya müasir Azərbaycan dövlətinin hüquqi əsaslarını formalaşdırdı. Demokratik institutların yaradılması, parlament seçkilərinin keçirilməsi və siyasi sistemin təkmilləşdirilməsi dövlət quruculuğunun mühüm mərhələləri oldu. Heydər Əliyevin siyasi fəlsəfəsinin əsas elementlərindən biri milli birlik ideyası idi. O hesab edirdi ki, ictimai-siyasi sabitlik olmadan heç bir sosial və iqtisadi inkişaf mümkün deyil. Bu yanaşma sonrakı dövrdə Azərbaycan inkişaf modelinin əsas komponentinə çevrildi. Milli Qurtuluşdan sonra qarşıda duran əsas vəzifələrdən biri iqtisadi böhranın aradan qaldırılması idi. Xüsusilə 1994-cü ildə imzalanan “Əsrin müqaviləsi” Azərbaycanın enerji siyasətində yeni mərhələ açdı. Bu müqavilə ölkənin beynəlxalq iqtisadi sistemə inteqrasiyasını sürətləndirdi və sonrakı iqtisadi yüksəlişin əsasını qoydu. Bu gün Azərbaycanın enerji diplomatiyasında əldə etdiyi uğurların kökləri məhz Milli Qurtuluş dövründə müəyyənləşdirilən strateji kursa söykənir”.
Ramil Vəlibəyov diqqətə çatdırıb ki, 15 İyun – Milli Qurtuluş Günü müasir Azərbaycan tarixində yalnız siyasi hadisə deyil, dövlətçilik fəlsəfəsinin və milli inkişaf modelinin başlanğıc nöqtəsidir: “1993-cü ildə həyata keçirilən xilaskarlıq missiyası nəticəsində Azərbaycan dövlət müstəqilliyini qoruyub saxlaya bildi, siyasi sabitlik təmin olundu, iqtisadi dirçəlişin əsasları yaradıldı və ölkənin gələcək inkişaf strategiyası formalaşdırıldı. Bu gün Azərbaycanın beynəlxalq nüfuzu, iqtisadi gücü, hərbi qüdrəti və ərazi bütövlüyünün tam bərpası Milli Qurtuluş dövründə müəyyən edilmiş dövlətçilik kursunun nəticəsi kimi qiymətləndirilə bilər. Tarixi baxımdan 15 iyun yalnız keçmişin deyil, həm də Azərbaycanın gələcəyinin formalaşmasında mühüm rol oynayan strateji hadisə kimi öz aktuallığını qorumaqdadır”.
