Müasir dövrdə informasiya cəmiyyətin inkişafını müəyyən edən əsas amillərdən birinə çevrilmişdir. Qlobal informasiya məkanında baş verən sürətli dəyişikliklər fonunda hər bir dövlət üçün etibarlı və güclü milli informasiya resurslarının formalaşdırılması strateji əhəmiyyət kəsb edir. Milli informasiya resursları ölkənin informasiya təhlükəsizliyinin təmin edilməsində, ictimai rəyin düzgün formalaşdırılmasında, milli maraqların qorunmasında və dövlətçilik ideologiyasının təbliğində mühüm rol oynayır.
Azərbaycanda müstəqillik illərində milli informasiya məkanının inkişafı dövlət siyasətinin prioritet istiqamətlərindən biri olmuşdur. Xüsusilə informasiya-kommunikasiya texnologiyalarının inkişafı, internetin geniş yayılması və rəqəmsal medianın formalaşması milli informasiya resurslarının əhatə dairəsini və təsir imkanlarını əhəmiyyətli dərəcədə genişləndirmişdir. Bu gün ölkəmizdə fəaliyyət göstərən televiziya və radio kanalları, xəbər agentlikləri, qəzetlər, xəbər portalları və digər rəqəmsal media platformaları cəmiyyətin operativ və obyektiv informasiya ilə təmin olunmasında mühüm funksiyanı yerinə yetirirlər.
Milli informasiya resurslarının əsas vəzifələrindən biri Azərbaycan həqiqətlərinin beynəlxalq ictimaiyyətə düzgün çatdırılmasıdır. Xüsusilə Ermənistanın uzun illər apardığı dezinformasiya siyasətinə qarşı mübarizədə milli media mühüm rol oynamışdır. 44 günlük Vətən müharibəsi dövründə Azərbaycan mediası və rəsmi informasiya resursları operativ, dəqiq və etibarlı məlumatların yayılması ilə informasiya cəbhəsində mühüm uğurlar əldə etmiş, ölkəmizin haqlı mövqeyinin dünya ictimaiyyətinə çatdırılmasına böyük töhfə vermişdir.
İşğaldan azad olunmuş ərazilərdə aparılan bərpa və yenidənqurma işləri, Böyük Qayıdış proqramı, Qarabağ və Şərqi Zəngəzurun sosial-iqtisadi inkişafı ilə bağlı məlumatların geniş şəkildə ictimaiyyətə təqdim olunması da milli informasiya resurslarının qarşısında duran mühüm vəzifələrdəndir. Bu resurslar Azərbaycanın əldə etdiyi uğurların, həyata keçirilən dövlət proqramlarının və beynəlxalq təşəbbüslərin ölkə daxilində və xaricdə obyektiv şəkildə təqdim edilməsinə xidmət edir.
Rəqəmsal texnologiyaların inkişafı milli informasiya resurslarının imkanlarını daha da artırmışdır. İnternet xəbər portalları, elektron media, sosial şəbəkələr və mobil platformalar informasiyanın sürətli yayılmasına şərait yaratsa da, eyni zamanda saxta xəbərlər, dezinformasiya və informasiya manipulyasiyaları kimi yeni təhlükələr də meydana çıxarmışdır. Bu baxımdan etibarlı milli informasiya resurslarının mövcudluğu cəmiyyətin düzgün məlumatlandırılması və informasiya təhlükəsizliyinin təmin edilməsi üçün xüsusi əhəmiyyət daşıyır.
Azərbaycanda media sahəsində həyata keçirilən islahatlar milli informasiya resurslarının daha da gücləndirilməsinə yönəlib. Medianın İnkişafı Agentliyinin fəaliyyəti, media qanunvericiliyinin müasirləşdirilməsi, jurnalistlərin peşəkarlığının artırılması, rəqəmsal medianın inkişafının dəstəklənməsi və informasiya mühitində sağlam rəqabətin təşviqi bu sahənin inkişafına mühüm töhfə verir. Bütün bunlar milli informasiya məkanının müasir tələblərə uyğun şəkildə formalaşmasına və beynəlxalq informasiya sisteminə uğurla inteqrasiyasına imkan yaradır.
Milli informasiya resursları yalnız xəbər mənbəyi deyil, həm də milli-mənəvi dəyərlərin qorunmasının, vətənpərvərlik ruhunun gücləndirilməsinin, cəmiyyətin maarifləndirilməsinin və dövlətçilik maraqlarının müdafiəsinin mühüm vasitəsidir. Peşəkar jurnalistika prinsiplərinə əsaslanan etibarlı informasiya resursları ictimai etimadın möhkəmlənməsinə, vətəndaşların düzgün məlumatlandırılmasına və cəmiyyətin sağlam inkişafına xidmət edir.
Müasir dövrün reallıqları göstərir ki, güclü dövlət yalnız inkişaf etmiş iqtisadiyyata və müasir infrastruktura deyil, eyni zamanda etibarlı və rəqabətqabiliyyətli milli informasiya resurslarına da malik olmalıdır. Azərbaycan bu istiqamətdə həyata keçirdiyi ardıcıl siyasət nəticəsində milli informasiya məkanını davamlı şəkildə gücləndirir, müasir texnologiyaların tətbiqini genişləndirir və informasiya təhlükəsizliyinin etibarlı təmin olunmasına xüsusi önəm verir.
Ariz Məmmədov ,
YAP Xətai rayon təşkilatnın fəalı
