Azərbaycanın müasir tarixində ərazi bütövlüyünün və suverenliyinin bərpası dövlətçilik salnaməsinin mühüm mərhələsini təşkil edir. Bu tarixi nailiyyətlər xalqın milli birliyi, dövlətin ardıcıl siyasəti, ordunun döyüş qabiliyyəti və ölkənin milli maraqlarını müdafiə etmək əzmi ilə sıx bağlıdır. Prezident İlham Əliyevin Yeni Azərbaycan Partiyasının VIII Qurultayında səsləndirdiyi fikirlər də Azərbaycanın əldə etdiyi uğurların arxasında dayanan siyasi iradəni və xalqın vahid mövqeyinin əhəmiyyətini ön plana çıxarır.
Dövlətlərin tarixində elə məqamlar olur ki, həmin dövrdə qəbul edilən qərarlar və göstərilən qətiyyət gələcək inkişafın istiqamətini müəyyənləşdirir. Azərbaycan üçün belə mərhələlərdən biri Vətən müharibəsi və sonrakı dövrdə suverenliyin tam bərpası ilə bağlı proseslərdir. Uzun illər davam edən münaqişənin həlli istiqamətində aparılan danışıqların nəticəsiz qalması, işğalın yaratdığı humanitar və sosial problemlər ölkənin qarşısında mürəkkəb vəzifələr qoymuşdu. Bu şəraitdə Azərbaycanın öz milli maraqlarını müdafiə etmək üçün siyasi, diplomatik və hərbi imkanlarını səfərbər etməsi xüsusi əhəmiyyət daşıyırdı.
2020-ci ildə başlanan Vətən müharibəsi Azərbaycanın tarixində yeni səhifə açdı. Azərbaycan Ordusunun döyüş meydanında əldə etdiyi uğurlar uzun illər işğal altında qalmış ərazilərin azad edilməsinə imkan yaratdı. Noyabrın 8-də Şuşanın azad olunması Zəfərin rəmzinə çevrildi. Bu hadisə hərbi əhəmiyyəti ilə yanaşı, milli yaddaşda xüsusi yer tutan tarixi hadisə kimi də qiymətləndirilir. Prezident İlham Əliyevin çıxışında 8 Noyabrın əbədi bayram kimi xarakterizə edilməsi həmin günün xalqımızın tarixindəki yerini ifadə edir.
Azərbaycanın əldə etdiyi nəticələrdə xalqın vahid mövqeyi mühüm rol oynadı. Cəmiyyətin müxtəlif təbəqələrinin ümumi milli məqsəd ətrafında birləşməsi dövlətin həyata keçirdiyi siyasətin ictimai dayaqlarını möhkəmləndirdi. Müharibə dövründə və sonrakı mərhələdə nümayiş etdirilən həmrəylik Azərbaycanın milli maraqlarının müdafiəsində mühüm amil oldu. Bu birlik yalnız hərbi əməliyyatlar zamanı deyil, azad edilmiş ərazilərin bərpası və ölkənin gələcək inkişafı baxımından da əhəmiyyətini qoruyur.
Zəfərdən sonra Azərbaycanın qarşısında duran əsas vəzifələrdən biri ərazi bütövlüyünün bərpası ilə kifayətlənmədən suverenliyin bütün ərazilərdə təmin olunması idi. 2023-cü il sentyabrın 19–20-də həyata keçirilən lokal xarakterli antiterror tədbirlərindən sonra Azərbaycanın bütün ərazisində dövlət hakimiyyətinin təmin olunması istiqamətində yeni mərhələ başlandı. Prezidentin çıxışında 20 Sentyabrın 8 Noyabrla yanaşı mühüm tarixi gün kimi qeyd edilməsi bu hadisənin dövlətçilik baxımından əhəmiyyətini vurğulayır.
Bu nailiyyətlər Azərbaycan xalqının yaddaşında şəhidlərin fədakarlığı ilə də bağlıdır. Vətən uğrunda həyatını itirən hər bir şəhidin xatirəsi milli tariximizin ayrılmaz hissəsidir. Onların qəhrəmanlığı azadlığın, təhlükəsizliyin və suverenliyin hansı böyük məsuliyyət və qurbanlar hesabına əldə olunduğunu xatırladır. Şəhidlərin xatirəsinin yaşadılması, ailələrinə dövlət qayğısının göstərilməsi və qazilərin sosial müdafiəsinin təmin olunması cəmiyyətin mənəvi borcudur.
Azərbaycanın Zəfərdən sonrakı dövrdə qarşılaşdığı siyasi və informasiya təzyiqləri də milli birliyin əhəmiyyətini gündəmdə saxlayır. Prezident İlham Əliyev çıxışında ölkənin qətiyyətli mövqeyinin və xalqın vahid iradəsinin müxtəlif maneələrin aradan qaldırılmasında rolunu vurğulayır. Bu yanaşma dövlətin milli maraqlarını müdafiə edərkən ardıcıllığın və cəmiyyətin birliyinin əhəmiyyətinə diqqət çəkir.
Bu gün Azərbaycanın qarşısında tarixi nailiyyətləri davamlı inkişafa çevirmək vəzifəsi dayanır. Azad edilmiş ərazilərin bərpası, keçmiş məcburi köçkünlərin doğma yurdlarına qayıdışı, iqtisadi imkanların genişləndirilməsi və regionda sülhün möhkəmləndirilməsi milli məqsədlərin yeni mərhələsini təşkil edir. Milli birlik bu proseslərin uğurla həyata keçirilməsi üçün mühüm ictimai dayaqlardan biridir.
Azərbaycanın təcrübəsi göstərir ki, dövlətin siyasi iradəsi və xalqın ümumi məqsəd ətrafında birləşməsi tarixi əhəmiyyətli nəticələrin əldə edilməsində mühüm rol oynayır. Vətən müharibəsindəki Zəfər və suverenliyin tam bərpası milli yaddaşda əbədi yaşayacaq hadisələrdir. Bu tarixi nailiyyətlərin qorunması və gələcək nəsillərə ötürülməsi isə hər bir vətəndaşın dövlətçilik qarşısında məsuliyyətini müəyyənləşdirir.
Kamil Qasimov,
YAP Xətai rayon təşkilatı fəalı
