Azərbaycan tarixində xüsusi yeri olan bölgələrdən biri də Laçındır. Təbii gözəllikləri, strateji mövqeyi və zəngin mədəni irsi ilə seçilən bu qədim diyar hər zaman xalqımız üçün böyük əhəmiyyət daşıyıb. 26 avqust tarixi isə Laçın şəhərinin həyatında mühüm dönüş nöqtəsini ifadə edən simvolik bir gündür.
Laçın Qarabağ dağlarının qoynunda yerləşir və əsrlər boyu həm iqtisadi, həm də hərbi baxımdan mühüm mövqeyə sahib olub. Burada formalaşan mədəniyyət, qədim abidələr, xalq sənətkarlığı və musiqi ənənələri Azərbaycanın ümumi milli sərvətinin ayrılmaz hissəsidir.
Eyni zamanda Laçın şəhəri Ermənistanla Azərbaycanı birləşdirən strateji yolun üzərində yerləşdiyi üçün tarix boyu böyük əhəmiyyət daşıyıb.
1992-ci ildə Ermənistan silahlı qüvvələri tərəfindən Laçının işğalı bölgə əhalisinin həyatında ən ağır fəsillərdən biri oldu. Minlərlə insan doğma yurd-yuvasını tərk etməyə məcbur qaldı, mədəni və tarixi abidələr dağıdıldı.
Lakin Azərbaycan xalqı heç vaxt doğma torpaqlarından imtina etmədi. 2020-ci ilin Vətən müharibəsində qazanılan böyük Qələbə nəticəsində Azərbaycan ərazilərinin böyük hissəsi işğaldan azad edildi. 2020-ci il 10 noyabr Bəyanatına əsasən, Laçın rayonu da erməni silahlı birləşmələrinin nəzarətindən çıxaraq Azərbaycana qaytarıldı.
Bu gün Laçın sürətlə bərpa olunur. Prezident İlham Əliyevin rəhbərliyi ilə həyata keçirilən “Böyük Qayıdış” proqramı çərçivəsində şəhərdə yeni infrastruktur layihələri icra edilir, müasir yaşayış kompleksləri salınır, yollar, məktəblər, xəstəxanalar və digər zəruri obyektlər inşa olunur.
Laçın artıq təkcə tarixi-mədəni əhəmiyyəti ilə deyil, həm də müasir inkişafı ilə Azərbaycanın yeni simvoluna çevrilir. Ən əsası isə laçınlıların doğma yurdlarına qayıdışı başlayıb – bu, bütün xalqımız üçün böyük qürur və sevinc yaşayır
26 avqust – Laçın şəhəri günü, sadəcə təqvimdə bir tarix deyil, Azərbaycan xalqının iradəsinin, birliyinin və əzminin təntənəsidir. Bu gün həm şəhidlərimizin ruhunu yad etmək, həm də azadlığın qədrini bilmək üçün mühüm məqamdır.
Laçın bu gün yenidən dirçəlir, gələcək nəsillərə doğma və güclü Azərbaycan torpağı kimi miras qalır.
Günel Əbdurahmanova,
Yeni Azərbaycan Partiyası, məsləhətçi
