Heydər Əliyevin rəhbərliyi ilə Azərbaycanın hərbi kadr potensialının formalaşması və inkişafı
1969-cu ildə Heydər Əliyevin siyasi rəhbərliyə gəlişi ilə Azərbaycan tarixində yeni mərhələ başlandı. Bu mərhələnin əsas sütunlarından biri ordu quruculuğu və hərbi kadrların sistemli şəkildə yetişdirilməsi idi. O dövrdə regionlar üzrə seçilən istedadlı gənclər SSRİ-nin aparıcı hərbi məktəblərinə göndərildi və vətənə yüksək ixtisaslı zabitlər kimi geri döndülər.
Heydər Əliyev yalnız hərbi biliklə kifayətlənməyən, eyni zamanda mənəvi cəhətdən sağlam, vətənə bağlı kadrların formalaşmasına çalışırdı. Onun təşəbbüsü ilə gənclər arasında hərbi xidmətə maraq artırıldı, Vətənə sədaqət anlayışı ideoloji əsaslara çevrildi. Bu, sadəcə texniki hazırlıq deyil, milli ruhun da gücləndirilməsi demək idi.
1970-1980-ci illər ərzində Azərbaycanın hərbi kadr potensialı SSRİ məkanında seçilən və tanınan bir nümunəyə çevrildi. Zabitlər təkcə ordu sıralarında deyil, müxtəlif hərbi-siyasi sahələrdə də müvəffəqiyyətlə təmsil olunmağa başladılar. Bu yüksəlişin arxasında Heydər Əliyevin uzaqgörənliyi və kadr strategiyası dayanırdı.
Bu gün Azərbaycanın müstəqil ordusunda xidmət edən yüksək peşəkar zabitlərin böyük bir qismi o dövrlərin təməlində yetişən nəsillərin davamıdır. Bu reallıq, Heydər Əliyevin milli təhlükəsizliyi təmin etmək üçün atdığı addımların dəyərini və nəticələrini açıq şəkildə nümayiş etdirir.
Fatimə Axundzadə
YAP Xəzər rayon təşkilatının fəalı
