Böyük sənaye layihələrinin həyata keçirilməsi üçün dövlətin və özəl sektorun imkanlarının birləşdirilməsi mühüm əhəmiyyət daşıyır. Dağ-mədən sənayesi yüksək kapital qoyuluşu tələb etdiyindən burada müxtəlif maliyyə mənbələrinin cəlb olunması layihələrin daha geniş miqyasda həyata keçirilməsinə imkan verə bilər. 2027–2030-cu illər Dövlət Proqramında dövlətlə yanaşı, yerli və xarici investorların da iştirakı üçün imkanların nəzərdə tutulması bu baxımdan diqqət çəkir.
Dövlətin əsas rolu strateji istiqamətləri müəyyənləşdirmək, müvafiq infrastruktur yaratmaq və layihələrin hüquqi-institusional əsaslarını formalaşdırmaqdan ibarət ola bilər. Özəl sektor isə maliyyə, texnologiya, idarəetmə və beynəlxalq bazarlara çıxış imkanları baxımından əlavə resurslar təqdim edə bilər. Bu iki istiqamətin bir-birini tamamlaması yeni layihələrin reallaşma imkanlarını genişləndirə bilər.
Xarici investorların iştirakı da müəyyən layihələr üzrə texnologiya və təcrübə transferinə şərait yarada bilər. Dağ-mədən və metallurgiya sahəsində müasir hasilat və emal texnologiyalarının tətbiqi istehsal səmərəliliyinin artırılması ilə yanaşı, ekoloji standartların yüksəldilməsinə də kömək edə bilər. Eyni zamanda xarici şirkətlərin beynəlxalq bazarlardakı əlaqələri Azərbaycan istehsalının yeni bazarlara çıxarılması üçün imkanlar yarada bilər.
Bununla yanaşı, dövlətin strateji resurslarla bağlı əsas maraqlarının qorunması da mühüm məsələdir. Dövlət başçısının çıxışında proqramın dövlət maliyyəsi hesabına istənilən halda icra ediləcəyi bildirilib. İnvestorların cəlb edilməsi isə əlavə imkan kimi nəzərdən keçirilir. Bu yanaşma dövlətin uzunmüddətli sənaye siyasətini təmin etməklə yanaşı, özəl kapital üçün də açıq investisiya mühiti formalaşdırmağa imkan verir.
Sevda Cabbarova,
YAP Nizami rayon təşkilatının “Babək prospekti, 75” ərazi partiya təşkilatının sədr müavini
