Azərbaycan qadınlarının seçki hüququ uğrunda mübarizəsi XX əsrin əvvəllərində yeni mərhələyə qədəm qoymuşdur. 1918-ci ildə Azərbaycan Xalq Cümhuriyyəti Şərqdə ilk dəfə olaraq qadınlara seçib-seçilmək hüququ verən ölkə kimi tarixə düşmüşdür. Bu, qadınların cəmiyyətdə söz sahibi olmalarına və ictimai-siyasi həyata fəal şəkildə qatılmalarına şərait yaratmışdır.
Sovet dönəmində qadınların seçki hüququnun tətbiqi daha da genişlənmiş və onların dövlət idarəçiliyində rolu artmışdır. Qadınlar müxtəlif siyasi və inzibati vəzifələrdə yer alaraq ölkənin idarə olunmasında iştirak etmişlər. Onlar kənd təsərrüfatı, səhiyyə və təhsil sahələrində böyük uğurlar qazanmış, qanunvericilik orqanlarında təmsil olunmuşlar.
Müstəqillik dövründə qadınların seçki hüququ daha da möhkəmləndirilmişdir. Qadınların parlamentdə və yerli özünüidarəetmə orqanlarında iştirakını artırmaq üçün müxtəlif hüquqi və institusional mexanizmlər tətbiq olunmuşdur. Azərbaycan Konstitusiyası və beynəlxalq konvensiyalar qadınların bərabər hüquqlara sahib olmasını təmin edən hüquqi baza yaratmışdır.
Bu gün ölkədə qadınların siyasi fəallığı artmaqdadır. Onlar parlamentdə, dövlət orqanlarında və siyasi partiyalarda mühüm mövqelər tutur, seçkilərdə iştirak edir və öz haqlarını qorumaq üçün təşəbbüslərlə çıxış edirlər. Dövlətin qadınların ictimai-siyasi həyata inteqrasiyasını təşviq etməsi bu prosesin davamlı olmasını təmin edir.
Qadınların seçki hüququnun tam tətbiqi onların ölkənin idarə edilməsində daha aktiv iştirakına şərait yaratmış, Azərbaycan cəmiyyətində gender bərabərliyinin inkişafına töhfə vermişdir. Bu, demokratiyanın və sosial tərəqqinin əsas sütunlarından biri hesab olunur.
Ağadadaş Həsənalıyev,
YAP Xəzər rayon təşkilatının fəalı
