Azərbaycan zəngin təbii sərvətləri, bənzərsiz biomüxtəlifliyi, dağlıq və düzənlik relyefi, Xəzər dənizi sahili ilə seçilən ölkələrdən biridir. Lakin sürətlə inkişaf edən sənaye, şəhərləşmə, əhali artımı və iqlim dəyişikliyinin yaratdığı qlobal təzyiqlər ölkədə ekoloji tarazlığın qorunmasını daha da vacib və strateji məsələ halına gətirir.
Ekoloji tarazlıq yalnız təbiətin deyil, insan həyatının, iqtisadiyyatın və sosial mühitin təhlükəsizliyinin əsas şərtidir. Buna görə də Azərbaycanda ətraf mühitə göstərilən diqqət dövlət siyasətinin prioritet istiqamətlərindən biri kimi formalaşıb. Ekoloji tarazlıq canlı və cansız təbiət elementlərinin qarşılıqlı əlaqəsi əsasında yaranan harmoniya vəziyyətidir. Bu tarazlığın pozulması iqlim dəyişikliklərini sürətləndirir, su ehtiyatlarının azalmasına səbəb olur, torpaqların deqradasiyasını artırır, biomüxtəlifliyin məhvinə gətirib çıxarır və insan sağlamlığına ciddi təhlükələr yaradır. Azərbaycan kimi iqlim müxtəlifliyi olan və müxtəlif ekosistemləri özündə birləşdirən ölkədə ekoloji tarazlığın qorunması həm strateji, həm də sosial əhəmiyyət daşıyır.
Ölkənin sənaye mərkəzləri, xüsusilə Bakı və Abşeron yarımadası uzun illər neft istehsalının yaratdığı ekoloji yüklə qarşılaşıb. Sovet dövründə formalaşmış köhnə quyular, torpağın və suyun neftlə çirklənməsi hələ də bərpa proqramlarının əsas hədəflərindən biridir.
Azərbaycan hökuməti ekoloji təhlükəsizliyi təmin etmək üçün bir sıra proqramlar həyata keçirir. Qarabağ və Şərqi Zəngəzur iqtisadi rayonları “yaşıl enerji zonası” elan edilib. Külək, günəş və bioenerji layihələrinin inkişafı planlaşdırılır ki, bu da karbon emissiyalarını azaltmağa imkan verəcək. Ekoloji tarazlığın qorunması təkcə dövlətin və ya beynəlxalq təşkilatların deyil, hər bir vətəndaşın məsuliyyətidir.
Azərbaycanda ekoloji tarazlığın qorunması təbii sərvətlərin, ətraf mühitin və gələcək nəsillərin rifahının təminatı deməkdir. Ətraf mühitə göstərilən diqqət həm ölkənin davamlı inkişafı, həm də ekoloji təhlükəsizliyin möhkəmləndirilməsi üçün zəruridir. Sənaye inkişafı, kənd təsərrüfatı, şəhərsalma və sosial layihələr ekoloji tələblər nəzərə alınmaqla həyata keçirilərsə, Azərbaycan bu sahədə regionun nümunəvi ölkələrindən birinə çevrilə bilər.
Siyasət Həsənov
YAP Xəzər rayon təşkilatının məsləhətçisi
