Azərbaycanın dövlət siyasətində idman və gənclər sahəsi həmişə vəhdət təşkil edib. 1994-cü ildə Gənclər və İdman Nazirliyinin yaradılması bu iki mühüm sahənin vahid mərkəzdən idarə olunmasına və dövlət gənclər siyasətinin fiziki hazırlıqla möhkəmləndirilməsinə xidmət edirdi. Ulu Öndər Heydər Əliyev 8 dekabr 2002-ci ildə vurğulayırdı: “Bizim xalqımızın gələcəyi gənclərdir. Gənclər isə gərək həm fiziki cəhətdən sağlam olsunlar, həm də yüksək şüura, yüksək biliyə malik olsunlar.” Bu fikir Azərbaycanın idman ölkəsi kimi formalaşmasının ideoloji təməlini təşkil edir.
Prezident İlham Əliyevin rəhbərliyi ilə Azərbaycanın hər bir bölgəsində müasir idman infrastrukturu qurulmuşdur. Ölkənin dörd bir yanında fəaliyyət göstərən 50-yə yaxın Olimpiya İdman Kompleksi təkcə peşəkar idmançıların yetişməsi üçün deyil, həm də gənclərin asudə vaxtının səmərəli təşkili və kütləvi idmanın inkişafı üçün nəzərdə tutulub. Sənəddə qeyd olunduğu kimi, sağlam həyat tərzi gənclərin cəmiyyətdə “ən dəyərli insan” kimi formalaşması üçün əsas şərtlərdən biridir.
İdman həm də güclü bir diplomatiya vasitəsidir. Azərbaycan gəncləri beynəlxalq yarışlarda iştirak edərək xalqımızın mədəniyyətini, qonaqpərvərliyini və sülhsevərliyini təbliğ edirlər. Gənc idmançılarımız xaricdə Azərbaycan həqiqətlərinin carçısına çevrilirlər. Onların hər bir qələbəsi dünya ictimaiyyətinin diqqətini müstəqil Azərbaycanın inkişafına yönəldir. Azərbaycan Respublikası müstəqilliyini bərpa etdikdən sonra keçdiyi inkişaf yolu ilə həm regional, həm də beynəlxalq müstəvidə özünü müasir, dinamik və gənclərə xüsusi önəm verən bir ölkə kimi təsdiq etmişdir. Bu gün ölkəmizdə həyata keçirilən gənclər siyasəti və idman sahəsindəki nailiyyətlər bir-birini tamamlayan strateji istiqamətlər kimi çıxış edir. Bu uğurlu yolun təməli Ümummilli Lider Heydər Əliyev tərəfindən qoyulmuş və bu gün Prezident İlham Əliyev tərəfindən uğurla davam etdirilməkdədir.
Azərbaycanda gənclər siyasətinin formalaşması dövlət quruculuğunun ayrılmaz hissəsidir. Ulu Öndər Heydər Əliyev hələ 1 fevral 1997-ci il tarixində imzaladığı xüsusi Sərəncama əsasən, fevralın 2-sini Azərbaycan Gəncləri Günü elan etmişdir. Həmin vaxtdan etibarən bu gün MDB məkanında və Şərqi Avropa ölkələri arasında ilk dəfə olaraq məhz Azərbaycanda təntənəli şəkildə qeyd edilməyə başlanmışdır. Bu fakt sübut edir ki, Azərbaycan gənclərə yönəlik siyasətində bir çox ölkələri, o cümlədən beynəlxalq ictimaiyyəti qabaqlamışdır. Belə ki, BMT-nin gənclər gününün qeyd olunması ilə bağlı qərarı bu təşəbbüsdən xeyli sonra baş tutmuşdur.
Dövlət gənclər siyasətinin əsas məqsədi intellektual, vətənpərvər və sağlam nəslin yetişdirilməsidir. Bu sahədə dövlət tərəfindən həyata keçirilən tədbirlər gənclərin potensialının üzə çıxarılmasına xidmət edir. Hazırda fəaliyyət göstərən Gənclərin İnkişaf və Karyera Mərkəzi 11 regional nümayəndəliyi və 44 bölməsi ilə regionlardakı gənclərin fərdi inkişafına, onların asudə vaxtının səmərəli təşkilinə dəstək verir. Eyni zamanda, 2011-ci ildə yaradılmış Gənclər Fondu vasitəsilə gənclərin elm, təhsil və mədəniyyət sahəsindəki fərdi və ictimai layihələri qrant şəklində maliyyələşdirilir. Bu dəstək mexanizmləri gənclərin cəmiyyətdə aktiv iştirakçıya çevrilməsinə böyük imkanlar açır.
Azərbaycanın “İdman Ölkəsi” kimi beynəlxalq nüfuzu da ildən-ilə artmaqdadır. Ölkədə idman infrastrukturunun qurulması, bölgələrdə müasir Olimpiya İdman Komplekslərinin inşası idmanın kütləviliyini təmin etmişdir. Bunun nəticəsidir ki, Azərbaycan idmançıları beynəlxalq arenada tarixi uğurlara imza atırlar. Təkcə 2024-cü ildə Azərbaycan idmançıları beynəlxalq yarışlarda 1200-dən çox medal qazanmışlar ki, bu da ölkə idmanının yüksək inkişaf səviyyəsinin göstəricisidir. 2015-ci ildə keçirilən Birinci Avropa Oyunları və ondan sonrakı möhtəşəm beynəlxalq tədbirlər Azərbaycanı dünyanın əsas idman mərkəzlərindən birinə çevirmişdir.
Müasir Azərbaycan gəncliyi həm də dövlətin kadr potensialını formalaşdırır. “Azərbaycan Respublikasında gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı” çərçivəsində hər il yüzlərlə gənc dünyanın ən qabaqcıl universitetlərinə göndərilir. Bu proqram gələcəkdə ölkənin idarəetmə və texnoloji sahələrində yüksək ixtisaslı kadrların təmsil olunmasını təmin edəcəkdir. Həmçinin, “Yüksəliş” müsabiqəsi kimi intellektual layihələr istedadlı gənclərin dövlət idarəçiliyində irəli çəkilməsinə şərait yaradır.
Vətənpərvərlik tərbiyəsi Azərbaycan gənclər siyasətinin ən parlaq nəticəsini 44 günlük Vətən müharibəsində göstərdi. Ulu Öndərin müəyyənləşdirdiyi “milli-mənəvi dəyərlərə sadiqlik” və “vətənpərvərlik” prinsipləri əsasında yetişən gənc nəsil torpaqlarımızın azadlığı uğrunda canından keçməyə hazır olduğunu bütün dünyaya nümayiş etdirdi. Bu gün gənclərimiz işğaldan azad edilmiş ərazilərin bərpasında, “Böyük Qayıdış” layihələrində və könüllülük hərəkatında ön sıralarda çıxış edərək dövlətimizin qüdrətini daha da artırırlar.
Yunis Eyyubov,
YAP Ağstafa rayon təşkilatının əməkdaşı
