Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısının iştirakçılarını qəbul edən Prezident İlham Əliyevin çıxışı Türk dünyasında təhlükəsizlik əməkdaşlığının yeni mərhələsini əks etdirən mühüm siyasi mesajlarla yadda qaldı. Bakıda keçirilən görüşdə TDT-nin təhlükəsizlik gündəliyi, regional sabitlik və mövcud təhdidlərə qarşı birgə fəaliyyət məsələləri diqqət mərkəzində olub. Bu toplantının ilk dəfə Azərbaycanda keçirilməsi də tədbirin institusional əhəmiyyətini artıran amillərdən biridir.
Prezident İlham Əliyev çıxışında təhlükəsizlik şuralarının müntəzəm görüşlərinin aktual risklərin müəyyənləşdirilməsi və onların qarşısının alınması baxımından əhəmiyyətli olduğunu bildirib. Müasir dövrdə təhlükəsizlik anlayışı yalnız hərbi məsələlərlə məhdudlaşmır. Terrorçuluq, transmilli cinayətkarlıq, narkotik vasitələrin qanunsuz dövriyyəsi, dini ekstremizm və hibrid təhdidlər kimi problemlər dövlətlər arasında daha sıx koordinasiya tələb edir.
Bakı görüşünün mühüm tərəflərindən biri də təhlükəsizlik qurumları arasında məlumat və təcrübə mübadiləsinin genişləndirilməsi məsələsidir. Prezident İlham Əliyev mümkün təhdidlərin əvvəlcədən müəyyənləşdirilməsi və profilaktik tədbirlərin gücləndirilməsinin vacibliyini diqqətə çatdırıb. Bu yanaşma təhlükəsizlik siyasətində preventiv mexanizmlərin əhəmiyyətini artırır.
Beləliklə, Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısının iştirakçılarını qəbul edən Prezident İlham Əliyevin çıxışı göstərdi ki, TDT daxilində təhlükəsizlik məsələləri artıq ayrıca və sistemli əməkdaşlıq istiqaməti kimi formalaşır. Bakı toplantısı Türk dövlətləri arasında qarşılıqlı etimadın, koordinasiyanın və institusional əlaqələrin inkişafına xidmət edən platformalardan biri kimi diqqət çəkir.
Rasim Quliyev,
YAP Nizami rayon təşkilatının “Əliağa Kürçaylı küçəsi, 8” ərazi partiya təşkilatının sədri
