Sentyabrın 22-də Azərbaycan Respublikasının Prezidenti İlham Əliyevin sədrliyi ilə “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirə keçirilmişdir.
Ölkənin qeyri-neft sektorunun şaxələndirilməsi, sənaye potensialının artırılması və yüksək əlavə dəyərli məhsulların istehsalına keçid baxımından bu Dövlət Proqramı strateji xarakter daşıyır.
Prezident İlham Əliyev: “Azərbaycanın iqtisadi inkişafı artıq yeni keyfiyyət mərhələsinə qədəm qoyub. Qeyri-neft sektorunun inkişafı, xüsusilə sənayeləşmə siyasəti bizim əsas prioritetlərimizdən biridir və dağ-mədən sektoru bu istiqamətdə mühüm rol oynayır.”
Prezident İlham Əliyev çıxışında ölkə iqtisadiyyatında neft-qaz amilinin rolunun tədricən sənayenin digər sahələri, xüsusilə də emal sənayesi və dağ-mədən sektoru hesabına diversifikasiya olunduğunu vurğulamışdır.
“Biz xammal ixrac edən ölkədən hazır məhsul istehsal edən və ixrac edən ölkəyə çevrilməliyik. Metallurgiya sənayesinin potensialı tam şəkildə reallaşdırılmalı, yeni dəyər zəncirləri yaradılmalıdır.”- bu sitat dövlət başçısının əsas iqtisadi xəttini – xammal ixracından dəyər zəncirinin yaradılmasına keçidi açıq şəkildə nümayiş etdirir. Gələcək illərdə metal filizlərinin sadəcə xam halda deyil, ölkə daxilində emal olunaraq yüksək keyfiyyətli metallurgiya məhsulları şəklində daxili və xarici bazarlara çıxarılması əsas hədəfdir.
Dövlət Proqramının əsas istiqamətləri və gözlənilən nəticələr:
Resurs bazasının genişləndirilməsi: Metal filizləri yataqlarının müasir texnologiyalar əsasında geoloji kəşfiyyatı və qiymətləndirilməsi.
İstehsal prosesində müasir texnologiyalar: Ətraf mühitin mühafizəsi tələblərinə (yaşıl enerji və ekoloji standartlar) cavab verən, tullantısız və ya az tullantılı qabaqcıl texnologiyaların tətbiqi.
İşğaldan azad edilmiş ərazilərin potensialı: Qarabağ və Şərqi Zəngəzur bölgələrində zəngin metal filizi ehtiyatlarının (məsələn, Zod, Qızılbulaq və s.) iqtisadi dövriyyəyə cəlb edilməsi.
Mütəxəssis hazırlığı və məşğulluq: Metallurgiya və dağ-mədən sahələri üzrə yüksək ixtisaslı kadrların hazırlanması, yeni iş yerlərinin açılması.
2027-2030-cu illər üçün nəzərdə tutulan bu Dövlət Proqramı Azərbaycanın sənaye xaricində ixrac potensialını gücləndirəcək, qeyri-neft ÜDM-in artımına təkan verəcək və ölkənin qlobal təchizat zəncirlərindəki rolunu daha da möhkəmləndirəcəkdir.
Heydər Rəhimov,
Nizami Bələdiyyəsinin sədr müavini
