Prezident İlham Əliyevin qeyd etdiyi kimi, Azərbaycan Xalq Cümhuriyyətinin yaradılması təkcə ölkəmiz üçün deyil, bütün müsəlman dünyası üçün əlamətdar və tarixi bir hadisə idi. 1918-ci ilin 28 mayında müstəqil Azərbaycan Cümhuriyyətinin elan edilməsi, Şərqdə və İslam coğrafiyasında ilk dəfə demokratik, hüquqi və parlament idarəetməsinə əsaslanan bir dövlətin qurulması demək idi. Bu hadisə, regionda dövlətçilik tarixində yeni bir səhifə açdı.
Azərbaycan xalqının bu təşəbbüskarlığı, onun mütərəqqi ideyaları mənimsəməyə nə qədər hazır və qabiliyyətli olduğunu sübut etdi. Həmin dövrdə Avropa modelləri əsasında formalaşan dövlət strukturu, qadınlara səsvermə hüququnun tanınması və mütərəqqi qanunvericilik təşəbbüsləri bu demokratik quruluşun əsas əlamətləri idi. İlham Əliyevin də vurğuladığı kimi, biz bu mirasa sahib çıxmaqla haqlı olaraq fəxr edirik.
Bu tarixi uğurun arxasında Azərbaycan ziyalılarının, siyasətçilərinin və maarifçilərinin misilsiz rolu dayanırdı. Onlar xalqın milli oyanışını təmin etdilər, milli kimliyi gücləndirdilər və cümhuriyyətin əsas ideoloji dayaqlarını formalaşdırdılar. Bu proseslər nəticəsində müsəlman aləmində ilk dəfə demokratiya prinsiplərinə söykənən dövlət reallığa çevrildi.
Prezident İlham Əliyevin bu fikirləri, sadəcə keçmişə hörmətin ifadəsi deyil, həm də bu günün və gələcəyin dövlətçilik fəlsəfəsinin əsas sütunlarını müəyyən edən strateji baxışdır. Tarixi dəyərləndirmə ilə milli kimliyin qorunması arasında qurulan bu körpü, müasir Azərbaycanın inkişaf kursunun ideoloji əsasını təşkil edir.
Sünbül Həsənquliyeva,
YAP Xəzər rayon təşkilatının fəalı
