12 noyabr 2025-ci ildə Prezident İlham Əliyevin Naxçıvanda Prezidentin yeni səlahiyyətli nümayəndəsini və bir sıra rayonların icra hakimiyyətlərinə təyin olunan başçıları qəbul edərkən söylədiyi çıxış ölkənin dövlət idarəçiliyi fəlsəfəsinin əsas istiqamətlərini bir daha təsdiqləyən, xüsusən də müasir dövrdə idarəetmə sistemində tələb olunan prinsipiallıq, şəffaflıq, intizam və xalqla sıx bağlılıq kimi meyarların nə qədər vacib olduğunu ortaya qoyan mühüm siyasi proqram xarakterli nitq oldu.
Cənab Prezident yeni təyinatların yalnız inzibati qərar deyil, həm də ciddi məsuliyyət daşıyan bir proses olduğunu vurğulayaraq bildirdi ki, hər bir məmur ilk olaraq dövlətə xidmət etməli, rəhbərlik etdiyi bölgənin problemləri ilə daim maraqlanmalı, insanlarla birbaşa təmasda olmalı və vəzifəsini şəxsi imtiyaz mənbəyi kimi deyil, xalqa xidmət vasitəsi kimi görməlidir. Onun sözlərinə görə, yeni təyin olunan nümayəndələr və icra başçıları əvvəlki illərdə yol verilmiş nöqsanlardan nəticə çıxarmalı, fəaliyyətlərini tamamilə şəffaf şəkildə qurmalı, eləcə də mərkəzi icra hakimiyyəti strukturları ilə sıx əlaqədə olaraq bölgələrin sosial-iqtisadi inkişafını daha da sürətləndirməlidirlər.
Nitqin mühüm hissələrindən biri korrupsiya ilə mübarizə mövzusu idi; Cənab Prezident açıq şəkildə bildirdi ki, icra hakimiyyətlərində korrupsiya, rüşvət, özbaşınalıq və ya vəzifə səlahiyyətlərindən sui-istifadə hallarına dözümlülük göstərilməyəcək, hər bir məmur davranışına görə şəxsən məsuliyyət daşıyır və kimsə özünü toxunulmaz hesab etməməlidir. O vurğuladı ki, məmurun davranışı yalnız özünü deyil, bütün dövlət aparatını təmsil edir və buna görə də həm icra başçılarının, həm də onların ailə üzvlərinin etik davranış standartlarına riayət etməsi zəruri şərtdir. Çıxışda Naxçıvanla bağlı xüsusi vurğular da yer aldı;
Cənab Prezident qeyd etdi ki, Naxçıvan Azərbaycanın strateji bölgəsi olmaqla yanaşı, həm də son illərdə yenidən qurulma mərhələsinə daxil olub və bu bölgədə Cənab Prezidentin səlahiyyətli nümayəndəsinin fəaliyyəti idarəetmənin keyfiyyətini yüksəltmək, sosial xidmətləri gücləndirmək, şəffaf mexanizmlər yaratmaq baxımından xüsusi məsuliyyət daşıyır. Bununla yanaşı, ölkənin digər rayonlarında da infrastruktur layihələrinin davam etdirilməsi, əhalinin rifahının yaxşılaşdırılması və yerli problemlərin operativ həllinə nail olunması yeni təyinatların əsas hədəflərindən biri kimi göstərildi. Cənab Prezident qeyd etdi ki, hazırkı mərhələdə Azərbaycan bölgələr üzrə inkişaf balansını qorumağı, mərkəzlə rayonlar arasında kordinasiyanı gücləndirməyi və idarəetmədə çevikliyi artırmağı prioritet hesab edir.
Nitqin başqa bir vurğusu ondan ibarət oldu ki, yeni icra başçıları yerlərdə insanları dinləməli, onlarla mütəmadi görüşlər keçirməli, vətəndaşların müraciətlərinə qapılarını açıq saxlamalı və heç bir halda özlərini xalqa yuxarıdan aşağı baxan məmur kimi aparmamalıdırlar. O, qeyd etdi ki, məmurun xidməti yalnız kabinetdə oturmaqla ölçülmür; əksinə, real nəticələr bölgənin inkişafında, insanların məmnunluğunda, sosial layihələrin keyfiyyətində və idarəetmənin effektivliyində öz əksini tapmalıdır.
Çıxışın ümumi məzmunu göstərirdi ki, dövlət idarəçiliyində yeni mərhələ artıq fəaliyyətdədir: daha çevik, daha hesabatlı, daha şəffaf və daha məsuliyyətli bir sistem formalaşdırılır və bu sistemin icrasında əsas yük məhz yerli icra strukturlarının üzərinə düşür. Prezident İlham Əliyevin bu nitqi həm xəbərdarlıq xarakteri daşıyırdı, həm də yeni təyinatlara verilən böyük etimadın ifadəsi idi; dövlət başçısı bir daha göstərdi ki, Azərbaycan idarəetməsində əsas meyar xalqa xidmət, ədalət, qanuna hörmət, milli maraqlara sadiqlik və nəticə yönümlü fəaliyyət olmaqda qalır.
Sahil Əliyev,
Yeni Azərbaycan Partiyası məsləhətçi
