2026-cı il aprelin 6-da Azərbaycan Respublikasının Prezidenti İlham Əliyevin Gürcüstana rəsmi səfəri çərçivəsində mətbuata verdiyi bəyanat Cənubi Qafqaz regionunda formalaşmış əməkdaşlıq modelinin uğurlu nümunəsi kimi diqqət çəkdi. Dövlət başçısının çıxışı yalnız ikitərəfli münasibətlərin cari vəziyyətini deyil, həm də gələcək inkişaf istiqamətlərini əhatə edən mühüm siyasi mesajlarla zəngin oldu.
Azərbaycan və Gürcüstan arasında münasibətlər uzun illərdir ki, qarşılıqlı etimad, mehriban qonşuluq və strateji tərəfdaşlıq prinsiplərinə əsaslanır. Prezident İlham Əliyev öz bəyanatında bu münasibətlərin sarsılmaz təməl üzərində qurulduğunu vurğulayaraq qeyd etdi ki, iki ölkə arasında siyasi dialoq ən yüksək səviyyədə davam edir.
Xüsusilə Cənub Qaz Dəhlizi kimi iri enerji layihələri vasitəsilə Azərbaycan qazı Gürcüstan üzərindən Avropa bazarlarına çatdırılır. Bu layihələr yalnız iqtisadi deyil, həm də geosiyasi əhəmiyyət daşıyır. Prezident İlham Əliyev vurğuladı ki, bu əməkdaşlıq Avropanın enerji təhlükəsizliyinin təmin olunmasına mühüm töhfə verir və tərəfdaş ölkələrin rolunu daha da gücləndirir.
Prezidentin çıxışında nəqliyyat və logistika sahəsində əməkdaşlıq da geniş şəkildə işıqlandırıldı. Azərbaycan və Gürcüstanın iştirak etdiyi beynəlxalq nəqliyyat layihələri, xüsusilə Orta Dəhliz, Avropa ilə Asiya arasında ən qısa və effektiv marşrutlardan biri hesab olunur. Bu marşrut vasitəsilə yüklərin daşınma müddətinin azalması, logistika xərclərinin optimallaşdırılması və ticarət dövriyyəsinin artması təmin edilir. Prezident qeyd etdi ki, bu sahədə əməkdaşlıq yalnız iki ölkənin deyil, bütövlükdə regionun iqtisadi inkişafına xidmət edir.
Prezident İlham Əliyev çıxışında regionda sülh və təhlükəsizlik məsələlərinə də toxundu. O vurğuladı ki, Azərbaycan Cənubi Qafqazda uzunmüddətli sülhün təmin olunmasının tərəfdarıdır və bu istiqamətdə ardıcıl addımlar atır. Gürcüstanla əməkdaşlıq da bu baxımdan xüsusi əhəmiyyət daşıyır. İki ölkə regional təhlükəsizlik məsələlərində ortaq maraqlardan çıxış edərək sabitliyin qorunmasına töhfə verir. Bu əməkdaşlıq regionda qarşılıqlı etimadın gücləndirilməsi üçün mühüm platforma rolunu oynayır.
Yalçın İsmayılov
YAP Ağstafa rayon təşkilatının sədr müavini
