Avropa İttifaqı bioiqtisadiyyatın potensialını daha geniş tətbiq etmək məqsədilə yeni inkişaf strategiyasını təqdim edib.
Aktualinfo.az AZƏRTAC-a istinadən xəbər verir ki, yeni sənəd bioəsaslı məhsulların fosil əsaslı materialları əvəz etməsini və təmiz sənayelərə keçidin sürətləndirilməsini hədəfləyir. Bioəsaslı kimyəvi maddələrdən plastiklərə, tikinti materiallarından gübrələrə qədər bu sahə geniş tətbiq imkanları ilə diqqət çəkir.
Strategiya dövlət və özəl investisiyaların səfərbər olunması ilə innovasiyaların genişləndirilməsini nəzərdə tutur. Kiçik müəssisələr üçün innovativ həllərin daha sürətli və sadə şəkildə təsdiqlənməsi məqsədilə tənzimləmə mexanizmləri yenilənəcək. Bioiqtisadiyyata sərmayələri artırmaq üçün xüsusi investisiya qrupu yaradılacaq.
Sənəd bioəsaslı materiallar üçün aparıcı bazarların formalaşdırılmasını da təşviq edir. Bu çərçivədə bioəsaslı məzmun üçün qanunvericilik hədəflərinin müəyyən edilməsi planlaşdırılır.
Strategiyada biokütlənin dayanıqlı istifadəsinə, o cümlədən kənd təsərrüfatı qalıqları və üzvi tullantıların daha səmərəli dövriyyəyə cəlb edilməsinə xüsusi diqqət ayrılıb. Həmçinin torpağın qorunması və karbon udma qabiliyyətinin artırılması kimi tədbirlərə töhfə verən fermerlərin dəstəklənməsi nəzərdə tutulur.
Hazırda Aİ-də 17 milyondan çox insanın məşğulluğunun təmin olunduğu bioiqtisadiyyatın dəyəri 2023-cü ildə 2,7 trilyon avroya çatıb. Yeni strategiya əvvəlki illərdə aparılan qiymətləndirmələrə əsaslanaraq rəqabət qabiliyyətinin və dayanıqlılığın gücləndirilməsini prioritet kimi müəyyənləşdirir.
