20 Yanvar 1990-cı il Azərbaycan tarixində Qara Yanvar kimi yadda qalmışdır. Həmin gecə Sovet İttifaqının silahlı qüvvələri Bakıya daxil olaraq dinc əhaliyə qarşı misli görünməmiş zorakılıq törətmişdir. Bu hadisə Azərbaycan xalqının azadlıq və müstəqillik yolunda verdiyi ən ağır qurbanlardan biri olmuşdur.
1990-cı ilin yanvarında Azərbaycan xalqı milli azadlıq hərəkatı çərçivəsində öz haqq səsini ucaldır, suverenlik və ədalət tələb edirdi. Lakin bu haqlı tələblərə cavab olaraq Sovet rəhbərliyi güc yolunu seçdi. 19-dan 20-nə keçən gecə Bakı şəhərinə tanklar, zirehli texnika və minlərlə əsgər yeridildi. Heç bir xəbərdarlıq edilmədən dinc insanlar atəşə tutuldu.
Nəticədə 130-dan çox günahsız insan həlak oldu, yüzlərlə şəxs yaralandı, çox sayda insan həbs edildi. Qadınlar, uşaqlar, yaşlı insanlar bu vəhşiliyin qurbanına çevrildi. Bu hadisə beynəlxalq hüquq normalarının kobud şəkildə pozulması idi.
20 Yanvar faciəsi təkcə böyük bir insan itkisi deyil, eyni zamanda Azərbaycan xalqının milli ruhunun sarsılmadığını nümayiş etdirdi. Əksinə, bu qanlı hadisə xalqın müstəqillik əzmini daha da gücləndirdi. Məhz bu faciədən sonra müstəqillik ideyası daha geniş şəkildə dəstəklənməyə başladı və 1991-ci ildə Azərbaycan öz dövlət müstəqilliyini bərpa etdi.
Bu gün 20 Yanvar şəhidləri Şəhidlər Xiyabanında dəfn olunmuş və xalq tərəfindən böyük ehtiramla yad edilir. Hər il 20 yanvar tarixində Azərbaycan xalqı şəhidlərin xatirəsini bir dəqiqəlik sükutla anır, onların qəhrəmanlığını və fədakarlığını minnətdarlıqla xatırlayır.
20 Yanvar şəhidləri Azərbaycan xalqının azadlıq mübarizəsinin simvoludur.
Murad Zeynalov,
Yeni Azərbaycan Partiyasının məsləhətçisi
