Hər il oktyabrın 25-i Azərbaycanda Qubadlı Şəhəri Günü kimi qeyd olunur. Bu əlamətdar tarix xalqımızın tarixi yaddaşında, milli birliyimizin və ərazi bütövlüyümüzün bərpası tarixində xüsusi yer tutur. 2020-ci il oktyabrın 25-də Qubadlı şəhərinin işğaldan azad edilməsi Azərbaycanın Vətən müharibəsində qazandığı tarixi Zəfərin mühüm mərhələlərindən biri olmuşdur.
Qubadlı torpaqlarının azadlığı uğrunda Azərbaycan Ordusunun göstərdiyi qəhrəmanlıq və fədakarlıq xalqımızın yaddaşında daim yaşayacaq. Bu gün azad edilmiş ərazilərdə aparılan genişmiqyaslı bərpa və quruculuq işləri Qubadlının əvvəlki həyatının yenidən canlandırılmasına, sakinlərin doğma yurdlarına qayıdışına zəmin yaradır.
Mahruzlu və Zilanlı kəndlərində yenidənqurma işləri Qubadlı rayonunun dirçəldilməsi istiqamətində həyata keçirilən tədbirlərin mühüm tərkib hissəsidir. Bu kəndlərdə müasir yaşayış mühitinin formalaşdırılması, infrastrukturun qurulması, yolların və kommunal xidmətlərin bərpası, sosial şəraitin yaxşılaşdırılması əsas məqsədlərdəndir. Görülən işlər doğma yurdlarından uzun illər ayrı düşmüş sakinlərin təhlükəsiz, rahat və müasir şəraitdə yaşamasına xidmət edir.
Azad edilmiş ərazilərdə həyata keçirilən bərpa prosesi yalnız yaşayış evlərinin tikintisi ilə məhdudlaşmır. Burada müasir infrastrukturun yaradılması, sosial obyektlərin qurulması, məşğulluq imkanlarının genişləndirilməsi və dayanıqlı yaşayış mühitinin formalaşdırılması da mühüm əhəmiyyət daşıyır. Mahruzlu və Zilanlı kəndlərinin yenidən qurulması da bu məqsədlərə xidmət edərək bölgənin sosial-iqtisadi inkişafına töhfə verir.
Qubadlıda aparılan quruculuq işləri Böyük Qayıdış proqramının həyata keçirilməsinin tərkib hissəsidir. Doğma torpaqlara qayıdış insanların illərlə yaşatdıqları arzuların gerçəkləşməsi, tarixi yurd yerlərində yeni həyatın başlanması deməkdir. Yenidən qurulan kəndlər gələcək nəsillər üçün təhlükəsiz, abad və müasir yaşayış məkanına çevrilir.
25 Oktyabr – Qubadlı Şəhəri Günü münasibətilə rayonun azadlığı uğrunda canlarından keçmiş şəhidlərimizin əziz xatirəsini dərin ehtiramla yad edir, qazilərimizə minnətdarlığımızı bildiririk. Qubadlının, o cümlədən Mahruzlu və Zilanlı kəndlərinin yenidən qurulması azad torpaqlarımızda həyatın bərpasının və gələcəyə inamla baxışın rəmzidir.
Amil İsrayılov,
YAP Şirvan şəhər təşkilatı məsləhətçi
