Qubadlı şəhəri Azərbaycanın qədim tarixi, zəngin mədəni irsi, füsunkar təbiəti və milli-mənəvi dəyərləri ilə seçilən doğma yurdlarımızdan biridir. Bərgüşad və Həkəri çaylarının hövzəsində yerləşən Qubadlı özünün əlverişli coğrafi mövqeyi, təbii sərvətləri, yaşıllıqları və tarixi abidələri ilə seçilir. Bu torpaq əsrlər boyu Azərbaycan xalqının həyatında mühüm yer tutmuş, burada formalaşan adət-ənənələr, mədəniyyət nümunələri və el-obaya bağlılıq hissi nəsildən-nəslə ötürülmüşdür. Qubadlı yalnız coğrafi məkan deyil, həm də minlərlə insanın uşaqlıq xatirələrini, ailə tarixini və doğma yurda bağlılığını özündə yaşadan müqəddəs torpaqdır.
1993-cü il avqustun 31-də Ermənistan silahlı qüvvələri tərəfindən işğal edilən Qubadlı uzun illər ağır sınaqlarla üzləşdi. Şəhərin və rayonun kəndlərinin işğalı nəticəsində sakinlər doğma evlərini tərk etməyə məcbur oldular, minlərlə insan məcburi köçkün həyatının çətinliklərini yaşadı. Tarixi yurd yerlərindən ayrı düşən qubadlılıların qəlbində doğma torpağa qayıtmaq ümidi daim yaşadı. Bu illər ərzində Qubadlı həsrətin, dözümün və sarsılmaz Vətən sevgisinin rəmzinə çevrildi. Lakin heç bir çətinlik xalqımızın öz torpaqlarına qayıtmaq əzmini və tarixi ədalətin bərpa olunacağına inamını sarsıda bilmədi.
2020-ci il sentyabrın 27-də başlayan Vətən müharibəsi Azərbaycan tarixində yeni bir mərhələnin əsasını qoydu. Azərbaycan Ordusunun Ali Baş Komandan, cənab Prezident İlham Əliyevin rəhbərliyi ilə həyata keçirdiyi uğurlu hərbi əməliyyatlar nəticəsində işğal altındakı torpaqlarımızın azadlığı təmin edildi. 2020-ci il oktyabrın 25-də Qubadlı şəhərinin işğaldan azad olunması bu tarixi Zəfərin mühüm hadisələrindən biri oldu. Azərbaycan əsgərinin qəhrəmanlığı, peşəkarlığı və fədakarlığı sayəsində Qubadlı yenidən öz sahibinə qovuşdu. Bu qələbə təkcə hərbi-strateji əhəmiyyət daşımır, həm də uzun illər doğma yurd həsrəti çəkən insanların qəlbində ümidin yenidən alovlanması demək idi.
25 oktyabr tarixinin Qubadlı Şəhəri Günü kimi qeyd edilməsi şəhərin azadlığı uğrunda canından keçən şəhidlərimizin xatirəsinə ehtiramın, qazilərimizin fədakarlığına minnətdarlığın və Azərbaycan xalqının milli birliyinin ifadəsidir. Bu tarix bizə bir daha xatırladır ki, Vətən torpağının azadlığı böyük iradə, birlik və misilsiz qəhrəmanlıq hesabına əldə edilir. Qubadlının azadlığı Azərbaycan Ordusunun gücünü, xalqımızın mübarizə əzmini və dövlətimizin qətiyyətini nümayiş etdirən tarixi qələbələrdən biri kimi yadda qalmışdır.
Qubadlının azad edilməsindən sonra bölgədə genişmiqyaslı bərpa və yenidənqurma işlərinə başlanıldı. Şəhərin müasir şəhərsalma prinsipləri əsasında inkişaf etdirilməsi, yol-nəqliyyat infrastrukturunun qurulması, yaşayış məhəllələrinin, təhsil və səhiyyə müəssisələrinin inşası doğma yurda yeni həyat bəxş edir. Qubadlı şəhərinin 2040-cı ilədək inkişafına dair Baş Planın təsdiqlənməsi bölgənin gələcək inkişafı üçün mühüm əhəmiyyət daşıyır. Bu layihələr Qubadlının yalnız keçmiş şöhrətinin bərpasına deyil, həm də müasir, dayanıqlı və firavan yaşayış məkanına çevrilməsinə xidmət edir.
Böyük Qayıdış prosesi Qubadlının gələcəyində xüsusi yer tutur. Doğma torpaqlarına qayıdan sakinlərin öz evlərində təhlükəsiz və rahat həyat qurması, sosial şəraitin yaxşılaşdırılması və iqtisadi fəallığın artırılması dövlətimizin qarşıya qoyduğu mühüm vəzifələrdəndir. Qubadlıda aparılan quruculuq işləri illərlə yurd həsrəti çəkən insanların arzularının gerçəkləşməsinə, bölgənin sosial və iqtisadi həyatının canlanmasına zəmin yaradır. Bu qayıdış həm də tarixi yaddaşın qorunması, milli kimliyin yaşadılması və gələcək nəsillərin doğma torpaqlara bağlılığının möhkəmləndirilməsi baxımından böyük əhəmiyyət kəsb edir.
Qubadlı Şəhəri Günü xalqımızın qəhrəmanlıq salnaməsini, şəhidlərimizin əbədi xatirəsini və Azərbaycan dövlətinin gücünü bir daha yada salan əlamətdar tarixdir. Bu günün mənası yalnız keçmişdə qazanılmış qələbəni qeyd etməklə məhdudlaşmır; o, həm də azad edilmiş torpaqların qorunması, inkişafı və gələcək nəsillərə bütöv şəkildə ötürülməsi məsuliyyətini ifadə edir. Qubadlının hər qarış torpağı Vətən uğrunda mübarizənin, milli həmrəyliyin və azadlıq iradəsinin canlı simvoludur.
Bu gün Qubadlı azadlığın, qürurun və yenidən doğuluşun ünvanıdır. Onun tarixi keçmişi, qəhrəmanlıqla dolu azadlıq yolu və gələcəyə yönəlmiş inkişafı Azərbaycan xalqının yaddaşında xüsusi yer tutur. Qubadlının dirçəlişi sübut edir ki, doğma torpağa sevgi, milli birlik və qətiyyət ən ağır sınaqları belə dəf etməyə qadirdir. Qubadlı Azərbaycanın Zəfər tarixində əbədi yaşayacaq, onun azadlığı və dirçəlişi isə gələcək nəsillər üçün Vətənə sədaqətin, mübarizliyin və milli qürurun parlaq nümunəsi olacaqdır.
Ayan İsmayılova,
YAP Yasamal rayon təşkilatının fəal gənci
