20 oktyabr Zəngilan şəhəri günü Azərbaycanın müasir tarixində xüsusi əhəmiyyət daşıyan əlamətdar günlərdən biridir. Bu tarix xalqımızın doğma torpaqlara qayıdış arzusunu, milli yaddaşını, tarixi irsə bağlılığını və işğaldan azad edilmiş ərazilərdə həyatın yenidən bərpası istiqamətində həyata keçirilən işləri özündə əks etdirir.
Zəngilan qədim tarixi, zəngin mədəni irsi və füsunkar təbiəti ilə Azərbaycanın seçilən bölgələrindən biridir. Bu diyarın hər qarışı xalqımızın keçmişindən xəbər verir, milli-mənəvi dəyərlərimizin yaşadılmasında mühüm yer tutur. Uzun illər doğma yurdlarından ayrı düşən zəngilanlıların qayıdış arzusu bu gün yenidən gerçəkləşir, şəhər və kəndlərdə həyat tədricən öz axarına qayıdır.
2020-ci ildə Vətən müharibəsi nəticəsində Zəngilan rayonunun işğaldan azad edilməsi Azərbaycan tarixinin mühüm hadisələrindən biri oldu. Oktyabrın 20-də Zəngilan şəhərinin azad olunması xalqımızın yaddaşında qürur və sevinc hissləri ilə yaşayır. Bu hadisə ərazi bütövlüyümüzün bərpası istiqamətində mühüm mərhələ olmaqla yanaşı, doğma torpaqlarına qovuşmaq istəyən insanların ümidlərini də gücləndirdi.
Bu gün Zəngilanda həyata keçirilən bərpa və quruculuq işləri regionun gələcək inkişafı üçün yeni imkanlar yaradır. Yol-nəqliyyat infrastrukturunun qurulması, yaşayış məntəqələrinin yenidən salınması, sosial obyektlərin yaradılması və iqtisadi potensialın inkişaf etdirilməsi bölgənin dirçəlişinə xidmət edir. Məqsəd yalnız dağıdılmış əraziləri bərpa etmək deyil, həm də insanların rahat yaşayacağı, işləyəcəyi və gələcək nəsillərin inkişaf edəcəyi müasir yaşayış mühiti formalaşdırmaqdır.
Zəngilanın inkişafı işğaldan azad edilmiş ərazilərin ölkənin ümumi iqtisadi və sosial həyatına inteqrasiyası baxımından da əhəmiyyətlidir. Rayonun əlverişli coğrafi mövqeyi, təbii sərvətləri və nəqliyyat imkanları onun gələcək potensialını artırır. Bu ərazidə yaradılan infrastruktur həm yerli əhalinin həyat şəraitinin yaxşılaşdırılmasına, həm də yeni iqtisadi əlaqələrin genişlənməsinə töhfə verir.
Zəngilan şəhəri günü münasibətilə bütün zəngilanlıları və xalqımızı təbrik edir, doğma yurda qayıdan ailələrə firavanlıq, bölgəyə davamlı inkişaf və ölkəmizə əmin-amanlıq arzulayırıq. Zəngilanın yenidən canlanması, küçələrində uşaqların səsinin eşidilməsi və doğma ocaqlarda həyatın davam etməsi Böyük Qayıdışın ən dəyərli nəticələrindəndir.
Tağı İmamverdiyev,
YAP Ağstafa rayon təşkilatının əməkdaşı
