Azərbaycan tarixində elə şəhərlər var ki, onların adı xalqımızın yaddaşında yalnız bir yaşayış məntəqəsi kimi deyil, həm də milli iradənin, vətən sevgisinin və yenilməz ruhun rəmzi kimi yaşayır. Zəngilan da bu şəhərlərdən biridir. 20 oktyabr – Zəngilan Şəhəri Günü xalqımızın tarixi yaddaşında xüsusi yer tutur, doğma torpaqlarımıza qayıdışın, ərazi bütövlüyümüzün bərpasının və işğaldan azad edilmiş ərazilərimizdə başlanan yeni həyatın təntənəsini ifadə edir.
Zəngilan şəhəri və rayonun digər yaşayış məntəqələri uzun illər işğal altında qalaraq böyük dağıntılara və məhrumiyyətlərə məruz qalmışdır. Doğma yurdlarından didərgin düşən zəngilanlılar illər boyu öz evlərinə qayıtmaq, ata-baba torpaqlarında yenidən yaşamaq arzusu ilə yaşamışlar. Bu arzu xalqımızın tarixi ədalətə inamını, Vətənə bağlılığını və milli birliyini daha da gücləndirmişdir. Azərbaycan xalqı heç vaxt torpaqlarının işğalı ilə barışmamış, doğma yurdlarımızın azad olunacağına olan inamını qoruyub saxlamışdır.
2020-ci il oktyabrın 20-də Zəngilan şəhərinin Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Ordumuz tərəfindən işğaldan azad edilməsi tariximizin əlamətdar hadisələrindən biri oldu. Bu qələbə Azərbaycan əsgərinin qəhrəmanlığını, xalqımızın birliyini və dövlətimizin gücünü bütün dünyaya nümayiş etdirdi. Zəngilanın azadlığı təkcə hərbi uğur deyil, həm də uzun illər yurd həsrəti ilə yaşayan insanların ümidlərinin gerçəkləşməsi, tarixi ədalətin bərpası demək idi.
Zəngilanın azad edilməsi Azərbaycanın ərazi bütövlüyünün təmin olunması istiqamətində mühüm mərhələ olmaqla yanaşı, bölgənin gələcək inkişafı üçün də yeni imkanlar yaratdı. İşğaldan azad olunmuş ərazilərdə aparılan genişmiqyaslı bərpa və quruculuq işləri dövlətimizin öz torpaqlarına verdiyi yüksək dəyərin bariz nümunəsidir. Bu gün Zəngilanda həyata keçirilən layihələr şəhərin müasir və dayanıqlı inkişafını, əhalinin doğma yurdlarına təhlükəsiz və layiqli qayıdışını hədəfləyir.
Prezident İlham Əliyevin rəhbərliyi ilə Zəngilan rayonunda müasir infrastrukturun qurulması, yolların çəkilməsi, yaşayış məntəqələrinin bərpası, sosial obyektlərin yaradılması və iqtisadi imkanların genişləndirilməsi istiqamətində mühüm addımlar atılır. Bölgənin strateji coğrafi mövqeyi, təbii sərvətləri və iqtisadi potensialı onun gələcək inkişafında əhəmiyyətli rol oynayır. Zəngilanın yenidən qurulması Azərbaycanın işğaldan azad edilmiş ərazilərində həyata keçirilən böyük qayıdış siyasətinin mühüm tərkib hissəsidir.
20 Oktyabr – Zəngilan Şəhəri Günü hər bir azərbaycanlı üçün qürur, sevinc və milli həmrəylik günüdür. Bu əlamətdar tarix xalqımızın öz torpaqlarına bağlılığını, tarixi ədalətə sadiqliyini və quruculuq əzmini bir daha nümayiş etdirir. İnanırıq ki, Zəngilan bundan sonra da inkişaf edəcək, öz tarixi və mədəni irsini qoruyaraq Azərbaycanın ən gözəl və müasir bölgələrindən birinə çevriləcəkdir. Zəngilanın azadlığı ilə başlanan yeni tarix doğma torpaqlarımızda həyatın yenidən canlanmasının və Azərbaycan xalqının böyük qayıdış arzusunun gerçəkləşməsinin parlaq nümunəsi olaraq daim yaşayacaqdır.
Yalçın İsmayılov,
YAP Ağstafa rayon təşkilatının sədr müavini
