Bəzi tarixlər var ki, yalnız təqvimdə bir gün kimi qalmır, bütöv bir xalqın taleyində dönüş nöqtəsinə çevrilir. 3 oktyabr 1993-cü il də Azərbaycan üçün məhz belə tarixlərdəndir. Həmin gün xalqın iradəsi ilə Ulu Öndər Heydər Əliyevin Azərbaycan Respublikasının Prezidenti seçilməsi ölkənin mürəkkəb və çətin bir mərhələdən sabitlik, inkişaf və güclü dövlətçilik yoluna çıxışının başlanğıcı oldu.
1993-cü ilin ağır siyasi reallıqları fonunda Heydər Əliyevin hakimiyyətə qayıdışı Azərbaycan dövlətçiliyinin qarşısında dayanan ciddi təhdidlərin aradan qaldırılması baxımından həlledici əhəmiyyət daşıdı. Ölkədə sabitliyin təmin edilməsi, dövlət institutlarının möhkəmləndirilməsi, qanunun aliliyinin bərqərar olunması və cəmiyyətin milli məqsədlər ətrafında birləşdirilməsi Ulu Öndərin dövlətçilik siyasətinin əsas istiqamətlərinə çevrildi.
Heydər Əliyevin rəhbərliyi ilə Azərbaycan tədricən siyasi böhrandan çıxaraq yeni inkişaf mərhələsinə qədəm qoydu. Ulu Öndər üçün müstəqillik yalnız əldə olunmuş siyasi status deyil, qorunmalı, möhkəmləndirilməli və gələcək nəsillərə əmanət edilməli ən böyük milli sərvət idi.
“Azərbaycan bir müstəqil dövlət kimi öz taleyinin sahibi, öz torpaqlarının sahibi, öz hüquqlarının sahibi olacaq və gələcək firavan həyatını özü quracaqdır”, – deyən Heydər Əliyev dövlətçilik siyasətinin əsas məqsədini aydın şəkildə ifadə edirdi.
Onun üçün güclü dövlətin təməlində siyasi sabitliklə yanaşı, iqtisadi müstəqillik də dayanırdı. “Əsrin müqaviləsi”nin imzalanması Azərbaycanın enerji potensialından milli inkişaf naminə istifadə edilməsində mühüm mərhələ oldu. Bu addım ölkənin iqtisadi imkanlarını genişləndirməklə yanaşı, Azərbaycanın beynəlxalq mövqeyinin möhkəmlənməsinə də ciddi təsir göstərdi.
Heydər Əliyevin dövlət idarəçiliyi məktəbinin əsasını peşəkarlıq, məsuliyyət, intizam və milli maraqlara sədaqət təşkil edirdi. O, dövlətin bütün sahələrində sistemli idarəetmənin qurulmasına, qanunun aliliyinin təmin edilməsinə və cinayətkarlığa qarşı qətiyyətli mübarizəyə xüsusi əhəmiyyət verirdi.
Ulu Öndərin siyasi fəaliyyətində xalqla birbaşa ünsiyyət, güclü natiqlik və inandırıcı siyasi mövqe də xüsusi yer tuturdu. Onun “Biz Azərbaycanda demokratik, hüquqi, dünyəvi dövlət qururuq” fikri müstəqil Azərbaycanın dövlət quruculuğu fəlsəfəsinin əsas istiqamətlərini özündə əks etdirirdi. Bu dövlətçilik modeli yalnız daxili sabitliyin təmin edilməsinə deyil, Azərbaycanın dünya birliyində layiqli yer tutmasına da xidmət etdi.
Heydər Əliyevin xarici siyasət strategiyasında Azərbaycanın milli maraqlarının beynəlxalq müstəvidə müdafiəsi mühüm yer tuturdu. Ermənistan-Azərbaycan münaqişəsi ilə bağlı həqiqətlərin dünya ictimaiyyətinə çatdırılması, Azərbaycanın ərazi bütövlüyü və suverenliyinin müdafiəsi Ulu Öndərin diplomatik fəaliyyətinin başlıca istiqamətlərindən idi.
Azərbaycanın müxtəlif dövlətlərlə siyasi və iqtisadi əlaqələrinin genişləndirilməsi, beynəlxalq təşkilatlarla əməkdaşlığın gücləndirilməsi ölkənin dünyaya inteqrasiyasını sürətləndirdi və beynəlxalq nüfuzunun artmasına şərait yaratdı. Heydər Əliyevin siyasi irsinin mərkəzində dəyişməz bir amal dayanırdı: Azərbaycanın müstəqilliyi və dövlətçiliyi.
“Azərbaycanın suverenliyi hər bir Azərbaycan vətəndaşı üçün ən müqəddəs məqsəddir, ən müqəddəs vəzifədir”, – deyən Ulu Öndər müstəqilliyin qorunmasını hər bir vətəndaşın milli məsuliyyəti kimi qiymətləndirirdi.
O, Azərbaycanın dövlət müstəqilliyinin dönməzliyinə də böyük inamla bildirirdi: “Azərbaycanın dövlət müstəqilliyi dönməzdir, yenilməzdir, sarsılmazdır. Biz Azərbaycanın dövlət müstəqilliyini bundan sonra da göz bəbəyimiz kimi qoruyacağıq, yüksəldəcəyik.” Bu sözlər sadəcə siyasi bəyanat deyildi. Bu, Azərbaycan dövlətçiliyinin gələcəyinə olan möhkəm inamın ifadəsi idi.
3 oktyabr 1993-cü il Azərbaycan xalqının öz taleyinə sahib çıxaraq güclü dövlətçilik yolunu seçdiyi tarixi gündür. Həmin gündən başlanan siyasi kurs Azərbaycanın sabitliyinin, iqtisadi inkişafının, beynəlxalq nüfuzunun və dövlətçilik ənənələrinin möhkəmlənməsində mühüm rol oynadı.
Heydər Əliyevin müəyyən etdiyi dövlətçilik strategiyası sonrakı illərdə Prezident İlham Əliyev tərəfindən davam etdirildi və yeni tarixi mərhələnin reallıqlarına uyğun şəkildə inkişaf etdirildi. Azərbaycanın güclənməsi, beynəlxalq mövqelərinin möhkəmlənməsi və ərazi bütövlüyünün bərpası bu ardıcıl dövlətçilik siyasətinin mühüm nəticələri sırasında yer aldı.
Bu gün 3 oktyabr 1993-cü ilə nəzər salarkən bir daha aydın olur ki, həmin gün yalnız Prezident seçkisi baş vermədi. Azərbaycan öz gələcəyinin istiqamətini müəyyənləşdirdi. Bu istiqamətin əsasında isə Heydər Əliyevin ömrünü həsr etdiyi üç böyük amal dayanırdı: müstəqil Azərbaycan, güclü dövlət və firavan xalq.
Ulu Öndərin dövlətçilik irsi zaman keçdikcə öz tarixi əhəmiyyətini daha aydın göstərir. Çünki onun siyasi fəaliyyətinin əsas qayəsi bir həqiqətdə cəmlənirdi: Azərbaycan öz taleyinin sahibi olmalı və öz gələcəyini özü qurmalıdır.
Aynur Şərif,
Yeni Azərbaycan Partiyası Nəsimi rayon təşkilatının əməkdaşı
