Azərbaycan iqtisadiyyatının yeni sənaye mərhələsi
Azərbaycan iqtisadiyyatının şaxələndirilməsi, qeyri-neft sektorunun inkişaf etdirilməsi və milli iqtisadi potensialın daha səmərəli reallaşdırılması istiqamətində həyata keçirilən siyasət yeni mərhələyə qədəm qoyur. Prezident İlham Əliyevin sədrliyi ilə keçirilən müşavirədə dağ-mədən və metallurgiya sənayesinin inkişafına dair 2027–2030-cu illər üçün Dövlət Proqramının təqdim edilməsi də məhz bu strateji yanaşmanın növbəti mühüm addımlarından biridir. Dövlət başçısı çıxışında dağ-mədən və metallurgiya sənayesini “ölkə iqtisadiyyatı üçün çox perspektivli sahə” kimi xarakterizə edib.
Yeni Dövlət Proqramı Azərbaycanın zəngin mineral resurslarından daha səmərəli istifadəni, xammalın emalının genişləndirilməsini və daha yüksək əlavə dəyər yaradan istehsal sahələrinin formalaşdırılmasını qarşıya məqsəd qoyur. Bu yanaşma yalnız ayrı-ayrı müəssisələrin inkişafını deyil, bütövlükdə yeni sənaye dəyər zəncirinin yaradılmasını nəzərdə tutur.
Proqram çərçivəsində 2027–2030-cu illərdə sektora ümumilikdə 5,3 milyard manat investisiyanın yönəldilməsi nəzərdə tutulur. Eyni zamanda, 2030-cu ilədək dağ-mədən və metallurgiya sektorunun ÜDM-ə töhfəsinin 700 milyon manatdan 1,8 milyard manata, illik ixrac potensialının isə 1,3 milyard manatdan 3,4 milyard manata çatdırılması hədəflənir.
Burada diqqətçəkən məqam yalnız təbii sərvətlərin hasilatı deyil, həmin resursların daha yüksək əlavə dəyər yaradan məhsullara çevrilməsidir. Beləliklə, Azərbaycan xammal potensialından daha çox iqtisadi fayda əldə etməklə yanaşı, sənaye istehsalında yeni imkanların formalaşdırılmasına da şərait yaradır.
Dövlət Proqramının icrası regionların sosial-iqtisadi inkişafı, investisiyaların cəlb edilməsi və yeni məşğulluq imkanlarının yaradılması baxımından da mühüm əhəmiyyət daşıyır. Dağ-mədən və metallurgiya sənayesinin inkişafı regionlarda istehsal infrastrukturunun genişlənməsinə, yeni müəssisələrin yaradılmasına və iqtisadi fəallığın artmasına əlavə stimul verə bilər.
Prezident İlham Əliyevin müşavirədə vurğuladığı kimi, bu proqram digər dövlət proqramları ilə birlikdə ölkə iqtisadiyyatının gücləndirilməsinə və regionların inkişafına xidmət etməlidir.
Əslində, yeni Dövlət Proqramı Azərbaycanın təbii sərvətlərini iqtisadi inkişafın yeni imkanlarına çevirmək strategiyasının mühüm tərkib hissəsidir. Qarşıdakı dörd il ərzində əsas məsələ yalnız hasilat göstəricilərinin artırılması deyil, yaradılan dəyərin ölkə daxilində formalaşdırılması, emal sənayesinin genişləndirilməsi və milli sənaye potensialının daha da gücləndirilməsidir.
Bu baxımdan, 2027–2030-cu illər Azərbaycan üçün təkcə yeni dövlət proqramının icra dövrü deyil, həm də dağ-mədən və metallurgiya sənayesinin inkişafında yeni mərhələnin formalaşdığı mühüm bir dövr ola bilər.
Tamerlan Qurbanov,
YAP Siyəzən Rayon Təşkilatının məsləhətçisi
