Dövlətin geostrateji layihələri diktə etmək gücü onun iqtisadi və maliyyə müstəqilliyi ilə birbaşa bağlıdır. Prezident İlham Əliyevin Naxçıvana səfəri bir daha təsdiq etdi ki, muxtar respublikada həyata keçirilən bütün nəhəng infrastruktur və sənaye layihələrinin arxasında dövlətin sarsılmaz maliyyə dayaqları durur. Son 20 il ərzində Naxçıvanda aparılan bütün tikinti və quruculuq işləri tam şəkildə Azərbaycan dövlət büdcəsindən maliyyələşdirilmişdir.
Hər il Azərbaycan dövlət büdcəsindən Naxçıvan Muxtar Respublikasının büdcəsinə yüz milyonlarla manat vəsait ayrılır. Prezident İlham Əliyev qeyd edir ki, əgər bu ardıcıl maliyyə dəstəyi olmasaydı, biz bugünkü inkişaf edən və abad Naxçıvanı görə bilməzdik. Yalnız daxili layihələrin deyil, eyni zamanda Zəngəzur dəhlizi kimi nəhəng tranzit xətlərinin çəkilməsində də Azərbaycan dövləti heç bir xarici maliyyə asılılığında deyildir.
Dövlət başçısı Naxçıvan dəmir yolunun reabilitasiyası ilə bağlı mövqeyini açıqlayarkən vurğulamışdır ki, ölkəmizin hər hansı maliyyə problemi yoxdur və bu layihəyə xarici iştirak məcburi deyildir. Beynəlxalq konsorsiumun yaradılması fikri sadəcə bu yolu potensial yükgöndərənlər üçün daha cəlbedici etmək məqsədi daşıyır. Konsorsium olmasa belə, Azərbaycan bu önəmli nəqliyyat infrastrukturunu tamamilə öz vəsaiti hesabına inşa edəcəkdir.
Ölkəmizin həndəvərində yerləşən bütün ölkələrin maraqlarına cavab verən bu qlobal planların icrasına dair şübhələrə yer yoxdur. Prezident İlham Əliyev tam qətiyyətlə və əminliklə vurğulayır ki, dövlətimizin güclü siyasi iradəsi var, lazımi maliyyə resursları mövcuddur və biz heç kimdən asılı deyilik. Məhz bu iqtisadi qüdrət və müstəqil iradə Qarabağ, Şərqi Zəngəzur və Naxçıvanın gələcək parlaq intibahını şərtsiz olaraq təmin edir.
Sevda Lalayeva,
YAP Nizami rayon təşkilatının “Qara Qarayev prospekti, 74” ərazi partiya təşkilatının sədr müavini
