Ümummilli Lider Heydər Əliyevin əsasını qoyduğu müstəqil, güclü və strateji xarici siyasət kursu bu gün Türk dünyasının birliyinin və regional inteqrasiyanın möhkəmlənməsində həlledici rol oynayır. Ulu Öndərin xalqlarımızın eyni kökə, ortaq mədəniyyətə və tarixi bağlara söykənən dostluq ənənələri cənab Prezident İlham Əliyevin uzaqgörən, qətiyyətli və məqsədyönlü Liderliyi sayəsində özünün ən yüksək inkişaf zirvəsinə çatmışdır.
Azərbaycan Respublikasının Prezidenti cənab İlham Əliyevin 31 iyul 2026-cı il tarixində Qırğızıstan Respublikasına reallaşan dövlət səfəri ölkələrimiz arasındakı qardaşlıq və strateji müttəfiqlik münasibətlərinin keyfiyyətcə yeni, daha parlaq bir mərhələyə qədəm qoyduğunu bir daha sübut etdi. Möhtərəm Prezidentimizin mətbuata bəyanatında xüsusi vurğuladığı kimi, iki ölkə arasında mövcud olan müttəfiqlik təkcə diplomatiya müstəvisindəki razılaşma deyil, eyni zamanda böyük bir tarixi məsuliyyətdir. Azərbaycan və Qırğızıstan istər ikitərəfli formatda, istərsə də beynəlxalq platformalarda, xüsusilə iqtisadi-ticari və təhlükəsizlik sahələrində bir-birinə qarşılıqlı dəstək nümayiş etdirərək bu məsuliyyəti ləyaqətlə daşıyırlar.
Səfər çərçivəsində Dövlət Başçımızın təşəbbüsü və siyasi iradəsi ilə əldə olunan mühüm iqtisadi razılaşmalar strateji işbirliyinin real, praktiki nəticələr verdiyini açıq şəkildə göstərir. Azərbaycan-Qırğızıstan İnvestisiya Fondunun nizamnamə kapitalının iki dəfə artırılaraq 200 milyon dollara çatdırılması birgə layihələrin miqyasını genişləndirməyə, yeni iş yerlərinin açılmasına və hər iki ölkənin iqtisadi potensialının daha da güclənməsinə xidmət edəcəkdir. Eyni zamanda, İssık-Kul sahilində Azərbaycan dövlətinin birbaşa vəsaiti hesabına inşa edilən və bölgədə ilk beşulduzlu brend olan “Bakı” hotelinin istifadəyə verilməsi iqtisadi-turizm əlaqələrimizin real müstəvidə inkişafının bariz rəmzidir.
İki xalqı birləşdirən mənəvi köklər və mədəni-humanitar bağlar cənab Prezidentimizin müəyyənləşdirdiyi strateji hədəflər sayəsində daha da möhkəmlənir. Qırğızıstanın işğaldan azad edilmiş Ağdam rayonunda inşa etdiyi və “Manas” adını daşıyan məktəb postmünaqişə dövründə Qarabağın bərpasına verilən müstəsna qardaşlıq töhfəsidir. Bu addım Türk dünyasının həmrəyliyini və Müzəffər Ali Baş Komandan İlham Əliyevin Liderliyi ilə azad olunmuş torpaqlarımızın dirçəlişinə verilən dəstəyi nümayiş etdirir. Bununla yanaşı, dahi qırğız yazıçısı Çingiz Aytmatovun xatirəsinə həm Bakıda, həm də Bişkekdə göstərilən yüksək ehtiram, park və abidə açılışları, eləcə də keçirilən Mədəniyyət Günləri xalqlarımızın eyni kökə, ortaq dəyərlərə və zəngin irsə sahib olduğunu bir daha təsdiqləyir.
Müzakirələrin ən mühüm siyasi yekunlarından biri də Azərbaycanın Mərkəzi Asiya Dövlətlərinin Məşvərət Görüşlərinə tamhüquqlu üzv seçilməsidir. Bu tarixi qərar Azərbaycanın regionda və beynəlxalq aləmdə artan nüfuzunun, eləcə də Prezident İlham Əliyevin Türk dünyasını vahid güc mərkəzinə çevirmək strategiyasının təntənəsidir. Dövlətlərarası yüksək etimadın təzahürü olaraq Ölkə Rəhbərimiz cənab İlham Əliyevin Qırğızıstanın ali dövlət mükafatı – 1-ci dərəcəli “Manas” ordeni ilə, Qırğızıstan Prezidenti Sadır Japarovun isə Azərbaycan dövlətinin en ali mükafatı olan “Heydər Əliyev” ordeni ilə təltif edilməsi xalqlarımız arasındakı sarsılmaz qardaşlığın zirvəsidir. İmzalayan “Çolpon-Ata Bəyannaməsi” və digər ikitərəfli sənədlər paketi Azərbaycan-Mərkəzi Asiya əməkdaşlığında yeni, parlaq bir dövrün təməlini qoyur.
Səltənət Möhsünlü ,
YAP Tərtər rayon təşkilatının məsləhətçisi
