2026-cı il iyulun 21-də Azərbaycan Respublikasının Prezidenti İlham Əliyevin Almaniya Federativ Respublikasına rəsmi səfəri iki ölkə arasında münasibətlərin inkişafında mühüm siyasi hadisə kimi qiymətləndirilir. Səfər çərçivəsində keçirilən yüksək səviyyəli görüşlər, aparılan müzakirələr və verilən bəyanatlar Azərbaycan–Almaniya əlaqələrinin yeni mərhələyə qədəm qoyduğunu, əməkdaşlığın siyasi, iqtisadi və enerji sahələri ilə yanaşı, regional təhlükəsizlik və beynəlxalq tərəfdaşlıq istiqamətlərində də genişləndiyini nümayiş etdirdi.
Prezident İlham Əliyev bəyanatında Azərbaycan ilə Almaniya arasında qarşılıqlı hörmətə və etimada əsaslanan münasibətlərin mövcud olduğunu vurğulayaraq, tərəflərin bir çox istiqamətlər üzrə əməkdaşlığı daha da dərinləşdirmək niyyətində olduqlarını bildirdi. Dövlət başçısı qeyd etdi ki, Almaniya Avropanın aparıcı iqtisadi gücü kimi Azərbaycanın Avropa ilə əlaqələrinin inkişafında mühüm tərəfdaşlardan biridir və bu əməkdaşlıq hər iki ölkənin maraqlarına xidmət edir.
Enerji təhlükəsizliyi məsələsi də Prezidentin çıxışında əsas mövzulardan biri idi. Dövlət başçısı Azərbaycanın Avropanın etibarlı enerji tərəfdaşı olduğunu bir daha vurğulayaraq bildirdi ki, ölkəmiz təkcə təbii qaz deyil, həm də yaşıl enerji sahəsində Avropa ilə sıx əməkdaşlıq edir. Azərbaycanın bərpaolunan enerji potensialı, Xəzər dənizində külək enerjisi layihələri və yaşıl elektrik enerjisinin Avropaya ixracı istiqamətində həyata keçirilən təşəbbüslər ölkəmizin enerji siyasətinin gələcəyə hesablandığını göstərir.
Prezident İlham Əliyev regional məsələlərə də toxunaraq Cənubi Qafqazda sülhün və sabitliyin təmin olunmasının Azərbaycan üçün prioritet olduğunu qeyd etdi. Dövlət başçısı Azərbaycanın beynəlxalq hüququn norma və prinsiplərinə əsaslanan davamlı sülhün tərəfdarı olduğunu bildirərək, regionda əməkdaşlığın genişlənməsinin bütün dövlətlərin inkişafına xidmət edəcəyini vurğuladı. Bu yanaşma Azərbaycanın konstruktiv və məsuliyyətli xarici siyasət kursunun növbəti təsdiqi kimi qiymətləndirilir.
Bəyanatda humanitar və mədəni əməkdaşlıq məsələləri də diqqət mərkəzində oldu. Təhsil, elm, innovasiya və mədəniyyət sahələrində əlaqələrin genişləndirilməsi xalqlar arasında qarşılıqlı anlaşmanın möhkəmləndirilməsi baxımından mühüm əhəmiyyət daşıyır. Bu istiqamətdə həyata keçiriləcək birgə layihələrin Azərbaycan–Almaniya münasibətlərini daha da zənginləşdirəcəyi bildirildi.
Prezident İlham Əliyevin Almaniyaya rəsmi səfəri bir daha göstərdi ki, Azərbaycan beynəlxalq aləmdə etibarlı tərəfdaş kimi qəbul olunur və müxtəlif siyasi mərkəzlərlə qarşılıqlı faydalı əməkdaşlıq siyasətini uğurla davam etdirir. Azərbaycanın balanslaşdırılmış xarici siyasəti ölkəmizin həm Avropa İttifaqı ölkələri, həm də digər beynəlxalq tərəfdaşlarla münasibətlərinin dinamik inkişafına əlverişli zəmin yaradır.
Yalçın İsmayılov,
YAP Ağstafa rayon təşkilatının sədr müavini
