Azərbaycan ilə Türkmənistan arasında münasibətlərin möhkəm təməl üzərində inkişaf etməsinin əsas səbəblərindən biri xalqlarımızı birləşdirən ortaq tarix, dil, mədəniyyət və mənəvi dəyərlərdir. Bu ortaq irs dövlətlərarası əlaqələrin inkişafında mühüm rol oynayır və əməkdaşlığın uzunmüddətli olmasını təmin edir. Prezident İlham Əliyevin də vurğuladığı kimi, münasibətlərimizin əsasında məhz tarixi bağlar və mənəvi yaxınlıq dayanır.
Son illər iki ölkə arasında mədəni-humanitar sahədə əlaqələr daha da genişlənib. Azərbaycanda Türkmənistan Mədəniyyəti Günlərinin, Türkmənistanda isə Azərbaycan Mədəniyyəti Günlərinin keçirilməsi xalqların bir-birinin mədəniyyətini daha yaxından tanımasına imkan yaradıb. Musiqi kollektivlərinin çıxışları, sərgilər və digər tədbirlər dostluq münasibətlərini daha da möhkəmləndirib.
Bakı və Aşqabad, eləcə də Füzuli və Arkadağ şəhərləri arasında qardaşlaşma münasibətlərinin qurulması iki ölkənin humanitar əməkdaşlığının mühüm göstəricisidir. Bu təşəbbüslər yalnız rəsmi münasibətlər deyil, həm də xalqlar arasında səmimi əlaqələrin inkişafına xidmət edir.
Mədəni əlaqələrin genişlənməsi gənc nəslin ortaq tarixi və milli dəyərləri daha dərindən öyrənməsinə də şərait yaradır. Qarşılıqlı səfərlər, təhsil və mədəniyyət layihələri gələcək əməkdaşlıq üçün möhkəm sosial baza formalaşdırır.
Azərbaycan və Türkmənistan ortaq milli-mənəvi dəyərlərin qorunmasına böyük önəm verir. Bu baxımdan humanitar əməkdaşlıq siyasi və iqtisadi münasibətləri tamamlayan əsas istiqamətlərdən biri hesab olunur. Xalqların bir-birinə olan rəğbəti dövlətlərarası münasibətlərin inkişafına müsbət təsir göstərir.
Prezident İlham Əliyevin həyata keçirdiyi siyasət nəticəsində Azərbaycanın dost ölkələrlə humanitar əlaqələri davamlı şəkildə genişlənir. Türkmənistanla bu istiqamətdə əldə olunan nailiyyətlər iki qardaş xalqın gələcəkdə də bir-birinə yaxın olacağını göstərir.
Mədəni və mənəvi bağlar Azərbaycan–Türkmənistan münasibətlərinin sarsılmaz dayağı olaraq qalır. Bu əlaqələrin gələcəkdə daha da genişlənməsi dostluğun, qardaşlığın və qarşılıqlı etimadın möhkəmlənməsinə mühüm töhfə verəcəkdir.
Sevinc Əliyeva,
YAP Nizami rayon təşkilatının fəalı
