Müasir dünyada dövlətlər arasında münasibətlərin möhkəmliyi təkcə iqtisadi maraqlarla ölçülmür. Tarixi bağlar, mədəni yaxınlıq, qarşılıqlı etimad və ortaq gələcək baxışı da əməkdaşlığın davamlılığını müəyyən edən əsas amillərdəndir. Azərbaycan ilə Türkmənistan arasında formalaşmış münasibətlər məhz belə möhkəm təməllər üzərində qurulub. Türkmənistan Prezidenti Sərdar Berdiməhəmmədovun 2026-cı il iyunun 22-də Azərbaycana rəsmi səfəri və Prezident İlham Əliyevin bu səfər zamanı verdiyi bəyanat bir daha göstərdi ki, iki qardaş ölkə arasındakı əlaqələr yeni inkişaf mərhələsinə qədəm qoyur. Azərbaycan və Türkmənistan xalqlarını birləşdirən amillər yalnız ortaq türk mənşəyi ilə məhdudlaşmır. Əsrlər boyu formalaşmış mədəni əlaqələr, dil yaxınlığı, milli-mənəvi dəyərlərin oxşarlığı və qarşılıqlı hörmət bu münasibətlərin əsas dayaqlarını təşkil edir. Məhz buna görə də iki ölkə arasında qurulan əməkdaşlıq siyasi maraqlardan daha geniş məna daşıyır. Bu münasibətlər qardaşlıq və etimad üzərində qurulan strateji tərəfdaşlıq nümunəsidir.
Prezident İlham Əliyevin çıxışında diqqət çəkən ilk məsələlərdən biri Qarabağın bərpası prosesində Türkmənistanın göstərdiyi dəstək oldu. Dövlət başçısı Türkmənistanın Milli Lideri Qurbanqulu Berdiməhəmmədovun təşəbbüsü ilə Füzuli şəhərində məscid tikintisinin başlanmasını xüsusi vurğuladı və bunu qardaş xalqın Azərbaycana səmimi münasibətinin növbəti təzahürü kimi qiymətləndirdi. Səfər zamanı aparılan müzakirələr göstərdi ki, Azərbaycan və Türkmənistan münasibətləri yalnız keçmişə deyil, həm də gələcəyə hesablanıb. Dövlət başçıları bir çox sahələr üzrə ətraflı fikir mübadiləsi aparıb, konkret tapşırıqlar müəyyənləşdiriblər. Mədəni-humanitar əlaqələr də iki ölkə münasibətlərinin mühüm istiqamətlərindən biridir. Son illərdə həm Azərbaycanda, həm də Türkmənistanda keçirilən Mədəniyyət Günləri xalqların bir-birini daha yaxından tanımasına və ortaq dəyərlərin təbliğinə xidmət edib. Prezident İlham Əliyevin vurğuladığı kimi, Bakı ilə Aşqabadın, Füzuli ilə Arkadağın qardaş şəhərlər elan olunması da münasibətlərin dərinləşməsinin göstəricisidir. Səfər zamanı diqqət çəkən mühüm məqamlardan biri də Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsində Türkmənistanın göstərdiyi dəstək oldu. Bu gün dünya yeni geosiyasi və geoiqtisadi reallıqlarla üz-üzədir. Belə şəraitdə nəqliyyat-logistika marşrutlarının əhəmiyyəti daha da artır. Azərbaycan və Türkmənistan bu baxımdan mühüm mövqeyə malik ölkələrdir. Enerji sektoru da Azərbaycan–Türkmənistan münasibətlərinin strateji istiqamətlərindən biridir. Hər iki ölkə zəngin neft və qaz ehtiyatlarına malikdir. Qlobal enerji təhlükəsizliyi məsələlərinin ön plana çıxdığı bir dövrdə bu əməkdaşlığın əhəmiyyəti daha da artır. Prezident İlham Əliyevin Türkmənistanın sosial-iqtisadi inkişafına verdiyi yüksək qiymət də diqqətəlayiqdir. Dövlət başçısı uzun illər ərzindəbu ölkəyə etdiyi səfərlər zamanı müşahidə etdiyi inkişafı xüsusi vurğuladı.
Səfər çərçivəsində imzalanan sənədlər isə əməkdaşlığın gələcək inkişafı üçün möhkəm hüquqi baza yaradır. Bu sənədlər iqtisadiyyat, nəqliyyat, enerji və humanitar sahələrdə yeni layihələrin həyata keçirilməsinə imkan verəcək.
Prezident Sərdar Berdiməhəmmədovun Azərbaycana səfəri və Prezident İlham Əliyevin verdiyi bəyanat bir daha sübut etdi ki, Azərbaycan–Türkmənistan münasibətləri sadəcə dostluq deyil, ortaq gələcəyə hesablanmış strateji tərəfdaşlıq, əməkdaşlıq əlaqələrinə əsaslanan nümunəvi modeldir.
Mənzər Ağabəyova,
Xəzər rayonu, 156 nömrəli tam orta məktəbin tarix müəllimi
