Müasir dünyanın sürətlə dəyişən siyasi və iqtisadi reallıqları fonunda dövlətlərin gücü təkcə malik olduqları resurslarla deyil, qurduqları etibarlı tərəfdaşlıqlarla ölçülür. Bu mənada Azərbaycan son illərdə həyata keçirdiyi balanslı, müstəqil və milli maraqlara söykənən xarici siyasət kursu ilə beynəlxalq münasibətlər sistemində xüsusi çəkisi olan ölkəyə çevrilmişdir. Prezident İlham Əliyevin rəhbərliyi ilə aparılan məqsədyönlü diplomatiya nəticəsində ölkəmiz regionun təşəbbüs göstərən, prosesləri istiqamətləndirən və əməkdaşlıq platformaları yaradan aparıcı dövlətlərindən birinə çevrilmişdir. Bu strateji xəttin məntiqi davamı olaraq Amerika Birləşmiş Ştatları ilə münasibətlərin keyfiyyətcə yeni mərhələyə yüksəlməsi, ABŞ-ın vitse-prezidenti Cey Di Vensinin Azərbaycana səfəri və səfər çərçivəsində imzalanmış Strateji Tərəfdaşlıq haqqında Xartiya iki ölkə arasında əlaqələrin artıq epizodik dialoq müstəvisindən çıxaraq sistemli, dərin və uzunmüddətli müttəfiqlik səviyyəsinə çatdığını nümayiş etdirir.
Bu sənəd mahiyyət etibarilə sadəcə diplomatik razılaşma deyil, gələcək onillikləri əhatə edən genişmiqyaslı əməkdaşlıq fəlsəfəsidir. Xartiya siyasi etimadı institusional mexanizmlərlə möhkəmləndirir, tərəflər arasında koordinasiyalı fəaliyyət üçün konkret çərçivə yaradır və əməkdaşlığı daimi xarakterə çevirir. Müasir beynəlxalq münasibətlərdə sabit tərəfdaşlıq yalnız niyyət bəyanatları ilə deyil, strukturlaşmış mexanizmlər və davamlı dialoqla təmin olunur. Azərbaycan və ABŞ məhz bu modeli seçərək münasibətləri yeni strateji mərhələyə daşıyır.
Enerji və nəqliyyat sahəsində əməkdaşlıq isə bu tərəfdaşlığın real iqtisadi dayağını təşkil edir. Azərbaycan artıq təkcə enerji resurslarının ixracatçısı deyil, həm də Avrasiya məkanında mühüm tranzit və logistika mərkəzidir. Şərqlə Qərbi birləşdirən nəqliyyat dəhlizləri, Trans-Xəzər marşrutları və multimodal logistika imkanları ölkəmizi qlobal təchizat zəncirinin əsas halqasına çevirib. ABŞ ilə bu sahədə əməkdaşlığın genişlənməsi Azərbaycanın geoiqtisadi əhəmiyyətini daha da artırır, yeni investisiyaların cəlb edilməsinə, infrastrukturun modernləşdirilməsinə və regional iqtisadi inteqrasiyanın dərinləşməsinə xidmət edir. Beləliklə, ölkəmiz təkcə resurs təminatçısı kimi deyil, həm də iqtisadi körpü və strateji qovşaq kimi mövqeyini möhkəmləndirir.
Xartiyanın ən diqqətçəkən cəhətlərindən biri əməkdaşlığın gələcəyin iqtisadiyyatını formalaşdıran sahələri əhatə etməsidir. Süni intellekt, rəqəmsal transformasiya, innovasiya ekosistemləri, elmi tədqiqat və texnologiya transferi istiqamətlərində nəzərdə tutulan birgə fəaliyyət Azərbaycanın inkişaf modelini yeni mərhələyə çıxarır. Qabaqcıl texnologiyaların tətbiqi, insan kapitalının gücləndirilməsi və rəqəmsal infrastrukturun genişləndirilməsi ölkəmizin bilik əsaslı iqtisadiyyata keçidini sürətləndirir. Bu əməkdaşlıq Azərbaycanın yalnız xammal ixrac edən deyil, yüksək texnoloji məhsul və xidmətlər yaradan dövlətə çevrilməsi üçün mühüm imkanlar açır.
Təhlükəsizlik sahəsində qarşılıqlı fəaliyyət də münasibətlərin mühüm sütununu təşkil edir. Müdafiə, terrorizmlə mübarizə, kibertəhlükəsizlik və humanitar minatəmizləmə kimi istiqamətlərdə əməkdaşlıq regionda sabitliyin möhkəmləndirilməsinə töhfə verir. Siyasi sabitlik və təhlükəsizlik mühitinin mövcudluğu isə iqtisadi inkişafın əsas şərtidir. Azərbaycan beynəlxalq sülh təşəbbüslərində fəal iştirakı ilə özünü məsuliyyətli tərəfdaş kimi təsdiqləyir və ABŞ ilə koordinasiya bu rolu daha da gücləndirir.
Bütün bunların fonunda imzalanmış Xartiya Azərbaycanın beynəlxalq mövqeyinin keyfiyyətcə dəyişdiyini göstərir. Ölkəmiz regionun əsas siyasi və iqtisadi söz sahibi olan dövlətlərindən birinə çevrilib. Azərbaycanın diplomatik nüfuzu, iqtisadi potensialı və strateji coğrafi mövqeyi onu böyük güclər üçün vacib əməkdaşlıq məkanına çevirib. Bu isə yürüdülən uzaqgörən siyasətin, milli maraqlara əsaslanan qərarların və dövlətçilik prinsipinə sadiqliyin təbii nəticəsidir.
Azərbaycan–ABŞ münasibətlərinin yeni mərhələsi bir daha sübut edir ki, gələcəyə hesablanmış strateji tərəfdaşlıq modeli ölkəmizin davamlı inkişafına, iqtisadi gücünün artmasına və beynəlxalq nüfuzunun möhkəmlənməsinə xidmət edir. Bu gün qurulan əməkdaşlıq yalnız bu günün deyil, sabahın və gələcək nəsillərin rifahını təmin edən möhkəm təməldir. Azərbaycan isə bu prosesdə təşəbbüskar, etibarlı və sözünün sahibi olan dövlət kimi tarixinin növbəti uğurlu səhifəsini yazır.
Turac İbrahimova,
Neft Kəmərləri İdarəsinin əməkdaşı,YAP Nizami rayon təşkilatının fəalı
