2025-ci il 22 avqust tarixində Türkmənistanın Türkmənbaşı şəhərində mühüm bir hadisə baş verdi – Azərbaycan, Türkmənistan və Özbəkistan dövlət başçıları yüksək səviyyəli üçtərəfli görüş keçirdilər. Görüş regional əməkdaşlığın strateji istiqamətlərinin müzakirəsi, yeni iqtisadi imkanların dəyərləndirilməsi və xalqlar arasında dostluq münasibətlərinin möhkəmləndirilməsi baxımından böyük əhəmiyyət kəsb edirdi. Zirvə görüşünün yekununda Azərbaycan Prezidenti İlham Əliyevin bəyanatı regionda yeni siyasi və iqtisadi reallıqların formalaşmasına dair mühüm mesajlar verdi.
İlham Əliyev bəyanatında qeyd etdi ki, Azərbaycan və Türkmənistan xalqları tarixən qardaşlıq münasibətləri ilə seçilmiş, eyni mədəni və mənəvi dəyərlər əsasında formalaşmış xalqlardır. O, həmçinin Özbəkistanla möhkəmlənən dostluq əlaqələrinin regional güc balansında mühüm rol oynadığını vurğuladı. Bu sözlər dövlət başçısının regiondakı ənənəvi əlaqələrə verdiyi yüksək qiyməti və gələcəyə yönəlmiş baxışını əks etdirirdi.
Görüşdə üç dövlətin qarşılıqlı maraqlarına xidmət edən bir sıra sahələr ön plana çəkildi: İlham Əliyev SOCAR-ın artıq Özbəkistanda neft yataqlarının işlənməsinə başladığını xatırladaraq, energetika sahəsində əməkdaşlığın strateji xarakter aldığını bildirdi. O, həmçinin qaz və elektrik enerjisinin ötürülməsi, istehsalı və ixracı ilə bağlı yeni layihələrin gündəmdə olduğunu vurğuladı. Prezident “Orta Dəhliz” layihəsinin, Xəzər dənizi üzərindən daşımaların, dəmir yolu və liman infrastrukturunun inkişaf etdirilməsinin vacibliyini qeyd etdi. Onun sözlərinə görə, bu əməkdaşlıq təkcə üç ölkəni deyil, bütövlükdə regionu beynəlxalq ticarət və tranzit mərkəzinə çevirə bilər. İlham Əliyev xalqların yaxınlaşması üçün humanitar əməkdaşlığın, xüsusən də qardaşlaşan şəhərlər – Füzuli və Arkadag kimi nümunələrin – əhəmiyyətini vurğuladı. Bu addımlar təkcə siyasi deyil, ictimai səviyyədə də əlaqələrin güclənməsinə xidmət edir. Prezident İlham Əliyevin bəyanatı yalnız konkret layihələrdən ibarət deyildi. Onun çıxışında dostluq, qardaşlıq və strateji tərəfdaşlıq ruhu açıq şəkildə hiss olunurdu. “Türkmənistan və Azərbaycan qardaş xalqlar kimi çiyin-çiyinə irəliləyəcək, yeni üfüqlərə doğru addımlayacaqlar.” Bu sözlər regionda sabitlik, qarşılıqlı etimad və birgə inkişaf strategiyasına çağırış kimi qiymətləndirilə bilər. Prezident həmçinin iqtisadiyyat, nəqliyyat və enerji sahələrində qəbul ediləcək qərarların uzunmüddətli perspektivdə regionun rifahına xidmət edəcəyini bəyan etdi.
22 avqust 2025-ci il tarixində Türkmənbaşı şəhərində keçirilən üçtərəfli zirvə görüşü və İlham Əliyevin bəyanatı bir daha göstərdi ki, Azərbaycan regional lider kimi təşəbbüskar mövqeyini qoruyur. Enerji, nəqliyyat və humanitar sahələrdə imzalanan razılaşmalar və qarşılıqlı anlaşmalar regionda sabitlik, inkişaf və qarşılıqlı faydalı əməkdaşlıq üçün möhkəm zəmin yaradır. Bu görüş həm də üç dövlətin vahid məqsədlər uğrunda birgə hərəkət etmək əzmini nümayiş etdirdi.
Günel Əbdürəhmanova,
Yeni Azərbaycan Partiyası, məsləhətçi
