2025-ci il aprelin 25-də Azərbaycan Respublikasının Prezidenti İlham Əliyev Çinin nüfuzlu beynəlxalq xəbər platformalarından biri olan CGTN (China Global Television Network) telekanalına geniş müsahibə verib. Bu müsahibə onun 22-24 aprel tarixlərində Çinə etdiyi rəsmi dövlət səfəri çərçivəsində baş tutub və Azərbaycan-Çin münasibətlərinin dinamik şəkildə inkişaf etməsinin bariz göstəricisinə çevrilib.
Prezident İlham Əliyev müsahibə zamanı Azərbaycan və Çin arasında münasibətlərin son illərdə sürətlə inkişaf etdiyini vurğulayaraq, imzalanan “Əhatəli Strateji Tərəfdaşlıq haqqında Bəyannamə”ni xüsusi qeyd edib. Bu sənəd iki ölkə arasında əməkdaşlığın sadəcə siyasi və iqtisadi sahələrlə məhdudlaşmadığını, həm də texnologiya, mədəniyyət, energetika və nəqliyyat sahələrini əhatə etdiyini göstərir.
Prezident İlham Əliyev Çin tərəfindən irəli sürülmüş “Bir kəmər, bir yol” təşəbbüsünü dəstəklədiyini və Azərbaycanın bu layihədə vacib tranzit və logistika rolu oynadığını qeyd edib. Azərbaycan Transxəzər Beynəlxalq Nəqliyyat Marşrutunun əsas iştirakçılarından biri kimi, Çindən Avropaya daşınan yüklər üçün etibarlı və sürətli yol təklif edir. Prezidentin sözlərinə görə, bu təşəbbüs çərçivəsində əməkdaşlıq regional iqtisadi inkişafın mühüm dayağına çevrilib.
Prezident İlham Əliyev açıqladığı mühüm yeniliklərdən biri də Azərbaycanla Çin arasında viza rejiminin sadələşdirilməsidir. Çin vətəndaşları artıq Azərbaycana vizasız səyahət edə biləcəklər. Bu addım qarşılıqlı turizm axınını gücləndirmək və xalqlar arasında təmasları artırmaq məqsədi daşıyır. Prezident əlavə edib ki:
Müsahibədə cənab İlham Əliyev Azərbaycanın COP29-a ev sahibliyi etməsinə də toxunub. O, Azərbaycanın iqlim dəyişikliklərinə qarşı qlobal səylərdə fəal iştirak etdiyini və bu istiqamətdə Çinlə əməkdaşlıq imkanlarının geniş olduğunu vurğulayıb.
Prezident müsahibə zamanı Azərbaycanın çay içmə mədəniyyəti haqqında da danışıb. O, Azərbaycanın ənənəvi armudu stəkanlarından və çayın təqdim olunma qaydasından bəhs edərək ölkəmizin zəngin mədəni irsini tanıdıb. Bu hissə CGTN tərəfindən böyük maraqla qarşılanıb və sosial şəbəkələrdə də geniş yayılıb.
Prezident İlham Əliyevin CGTN telekanalına verdiyi bu müsahibə Azərbaycanın Asiya ilə əlaqələrinin strateji səviyyəyə keçdiyini və Çin ilə münasibətlərin regional və qlobal miqyasda mühüm önəm daşıdığını bir daha təsdiq etdi. Əhatəli Strateji Tərəfdaşlıq, vizasız rejim, “Bir kəmər, bir yol” çərçivəsində əməkdaşlıq və COP29 kimi mövzular qarşılıqlı etimad və uzunmüddətli əməkdaşlıq üçün möhkəm təməl yaradır.
Bu müsahibə həmçinin Azərbaycanın beynəlxalq arenadakı mövqeyinin daha da möhkəmləndiyini, Prezident Əliyevin isə bu siyasətin əsas memarı olduğunu göstərdi.
Tünzalə Əliyeva,
Yeni Azərbaycan Partiyası Nizami rayon təşkilatının məsləhətçisi
