Azərbaycan Respublikasının Prezidenti İlham Əliyev 2025-ci il aprelin 25-də Çin Xalq Respublikasının nüfuzlu CGTN telekanalına müsahibə verib. Müsahibə zamanı dövlət başçısı ölkəsinin xarici siyasət prioritetlərindən, regional təhlükəsizlik məsələlərindən və Çin-Azərbaycan münasibətlərindən ətraflı bəhs edib. Prezident vurğulayıb ki, Azərbaycanla Çin arasında qarşılıqlı hörmətə əsaslanan əməkdaşlıq son illərdə daha da güclənib və bu istiqamətdə yeni mərhələyə qədəm qoyulub.
Müsahibədə Prezident İlham Əliyev “Bir Kəmər, Bir Yol” təşəbbüsünün regional və qlobal səviyyədə iqtisadi inteqrasiyanı təşviq etdiyini, Azərbaycanın isə bu təşəbbüsdə fəal iştirak etdiyini bildirib. O qeyd edib ki, Bakı-Tbilisi-Qars dəmir yolu və Ələt Beynəlxalq Dəniz Ticarət Limanı kimi infrastruktur layihələri bu prosesə konkret töhfələr verir. Azərbaycan lideri bu əməkdaşlığın gələcəkdə nəqliyyat və logistika sahəsində strateji üstünlüklər yaratdığını da vurğulayıb.
Söhbət zamanı enerji sahəsindəki inkişaf da diqqət mərkəzində olub. Prezident Əliyev bildirib ki, Azərbaycan təkcə neft və qaz ixracatçısı deyil, eyni zamanda bərpaolunan enerji mənbələrinə də böyük diqqət ayırır. Bu kontekstdə Çin şirkətləri ilə həyata keçirilən birgə layihələrə toxunaraq, onların regional enerji təhlükəsizliyinə verdiyi töhfəni qeyd edib.
Sonda dövlət başçısı CGTN kanalının auditoriyasına müraciət edərək Azərbaycanın inkişaf yolundan, iqtisadi sabitliyindən və multikultural cəmiyyətindən danışıb. O, Çin ilə əlaqələrin daha da dərinləşəcəyinə ümid etdiyini bildirib və bu istiqamətdə siyasi iradənin möhkəm olduğunu vurğulayıb.
Ələkbər Novruzov
YAP Xəzər rayon təşkilatının fəalı
