Konstitusiya yalnız dövlət orqanlarının fəaliyyətini tənzimləyən sənəd deyil, həm də hər bir vətəndaşın hüquq və vəzifələrini müəyyən edən əsas hüquqi mənbədir. Vətəndaşın hüquqlarını bilməsi, qanunlara hörmət etməsi və cəmiyyət qarşısında məsuliyyətini dərk etməsi hüquqi dövlətin inkişafı üçün vacib şərtdir.
Azərbaycan Respublikasının Konstitusiyasında vətəndaşların hüquq və azadlıqları ilə yanaşı, onların əsas vəzifələri də müəyyən edilmişdir. Dövlətə və qanunlara hörmət, vergi öhdəliklərinin yerinə yetirilməsi, ətraf mühitin qorunması və Vətənin müdafiəsi kimi vəzifələr ictimai məsuliyyətin mühüm istiqamətləridir.
Hüquq və vəzifələr arasında tarazlığın qorunması demokratik cəmiyyətin əsas prinsiplərindəndir. Hər bir insan öz hüquqlarından istifadə edərkən digər şəxslərin hüquqlarına hörmət etməli, ictimai qaydalara və qanunvericiliyin tələblərinə əməl etməlidir. Bu yanaşma cəmiyyətdə qarşılıqlı etimadın və hüquqi mədəniyyətin formalaşmasına xidmət edir.
Vətəndaş məsuliyyəti xüsusilə gənc nəslin tərbiyəsində mühüm əhəmiyyət daşıyır. Məktəblərdə, ali təhsil müəssisələrində və ictimai mühitdə hüquqi maarifləndirmənin gücləndirilməsi gənclərin Konstitusiyanın mahiyyətini daha dərindən anlamasına imkan yaradır. Dövlətçilik düşüncəsi hüquqi bilik və vətəndaş mövqeyi ilə möhkəmlənir.
Konstitusiyaya hörmət hər bir vətəndaşın gündəlik davranışında özünü göstərməlidir. Qanunlara əməl etmək, ictimai maraqları qorumaq və dövlətin inkişafına töhfə vermək müasir vətəndaş mövqeyinin əsas göstəriciləridir. Güclü dövlət məsuliyyətli vətəndaşların birgə səyi ilə formalaşır.
Elxan İskəndərov,
YAP Nizami rayon təşkilatının “Heydər Əliyev prospekti, 142” ərazi partiya təşkilatının sədr müavini
