Hər il noyabrın 9-u Azərbaycanda Dövlət Bayrağı Günü kimi qeyd olunur. Azərbaycan Respublikasının Dövlət Bayrağı xalqımızın milli kimliyini, müstəqilliyini, suverenliyini və dövlətçilik ənənələrini təcəssüm etdirən əsas rəmzlərdən biridir. Üçrəngli bayrağımızın tarixi Azərbaycan Xalq Cümhuriyyətinin yaranması dövrünə gedib çıxır. 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə üçrəngli dövlət bayrağı qəbul edilmişdir. Bu bayraq 1920-ci il aprelin 27-dək Azərbaycan dövlətinin rəsmi rəmzi olmuşdur. Azərbaycan Xalq Cümhuriyyətinin süqutundan sonra sovet hakimiyyəti dövründə üçrəngli bayrağımız dövlət rəmzi kimi istifadədən çıxarılmışdır.
Azərbaycanın müstəqillik uğrunda mübarizəsi dövründə üçrəngli bayrağın yenidən bərpası mühüm tarixi hadisəyə çevrildi. 1990-cı il noyabrın 17-də Naxçıvan Muxtar Respublikası Ali Məclisinin ulu öndər Heydər Əliyevin təşəbbüsü və rəhbərliyi ilə keçirilən sessiyasında Azərbaycan Xalq Cümhuriyyətinin üçrəngli bayrağı Naxçıvan Muxtar Respublikasının dövlət bayrağı kimi qəbul edildi. 1991-ci il fevralın 5-də Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək üçrəngli bayrağı ölkəmizin Dövlət Bayrağı elan etdi. Həmin il oktyabrın 18-də dövlət müstəqilliyinin bərpası haqqında Konstitusiya Aktı qəbul olundu və Azərbaycan Xalq Cümhuriyyətinin dövlətçilik irsinə, o cümlədən dövlət rəmzlərinə hüquqi varislik təsdiq edildi.
Azərbaycan Respublikasının Dövlət Bayrağı üç üfüqi zolaqdan ibarətdir. Yuxarıdakı mavi rəng Azərbaycan xalqının türk mənşəyini və milli kimliyini, ortadakı qırmızı rəng müasir cəmiyyət qurmaq, demokratiyanı inkişaf etdirmək və tərəqqiyə nail olmaq istəyini, aşağıdakı yaşıl rəng isə İslam sivilizasiyasına mənsubluğu ifadə edir. Qırmızı zolağın ortasında yerləşən ağ aypara və səkkizguşəli ulduz bayrağın əsas rəmzlərindəndir. Bayrağın hər iki üzündə bu təsvirlər eyni şəkildə əks olunmuşdur. Beləliklə, üçrəngli bayraq xalqımızın milli, mənəvi və müasir inkişaf dəyərlərini özündə birləşdirir.
Dövlət Bayrağına olan ehtiramın artırılması və onun dövlətçilik rəmzi kimi mövqeyinin möhkəmləndirilməsi istiqamətində mühüm addımlar atılmışdır. Prezident İlham Əliyevin 2007-ci il noyabrın 17-də imzaladığı Sərəncamla Bakıda Dövlət Bayrağı Meydanının yaradılması qərara alınmışdır. Meydanın açılışı 2010-cu il sentyabrın 1-də keçirilmişdir. Prezident İlham Əliyevin 2009-cu il noyabrın 17-də imzaladığı Sərəncamla isə hər il noyabrın 9-u Azərbaycan Respublikasının Dövlət Bayrağı Günü elan edilmişdir. Həmin tarixdən etibarən bu gün ölkəmizdə rəsmi bayram kimi qeyd olunur.
Dövlət Bayrağı Azərbaycanın beynəlxalq aləmdə tanınmasının, müstəqil dövlət kimi təmsil olunmasının da əsas göstəricilərindəndir. Bayrağımız xarici ölkələrdəki diplomatik nümayəndəliklərimizin binalarında, beynəlxalq təşkilatlarda, idman yarışlarında və müxtəlif rəsmi tədbirlərdə dalğalanaraq ölkəmizi təmsil edir. 2020-ci ildə Vətən müharibəsində əldə edilən qələbə və 2023-cü ildə Azərbaycanın bütün ərazilərində suverenliyinin bərpa olunması dövlət bayrağımızın ölkə ərazisində dalğalanması baxımından xüsusi tarixi əhəmiyyət daşıyır.
Beləliklə, 9 Noyabr – Dövlət Bayrağı Günü xalqımızın müstəqillik tarixini, milli birliyini və dövlətçilik ənənələrini xatırladan əlamətdar gündür. Üçrəngli bayrağımız keçmişdən gələcəyə uzanan milli irsimizin, azadlıq və müstəqillik ideallarımızın rəmzidir. Dövlət bayrağına hörmət etmək, onu qorumaq və gələcək nəsillərə çatdırmaq hər bir vətəndaşın mənəvi borcudur.
Aysun Mahmudova,
YAP Yasamal rayon təşkilatının fəal gənci
